ភ្នំពេញ៖ នៅថ្ងៃទី១០ ខែកញ្ញា ឆ្នាំ២០២៦ តាងនាម ឯកឧត្តម គីម វីរៈ អនុប្រធាន និងជាអគ្គលេខាធិការ គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) ឯកឧត្តម ប្រាក់ គីមហុង អគ្គលេខាធិការរង គ.ជ.គ.ម. បានទទួលជួបក្រុមបេសកកម្មរបស់សហរដ្ឋអាមេរិក ដឹកនាំដោយ លោក ម៉ៃឃើល រុននីង (Michael Ronning) ប្រធានផ្នែកជំនួយយុទ្ធសាស្ត្រតំបន់ នៃស្ថានទូតសហរដ្ឋអាមេរិក ដើម្បីពិភាក្សាអំពីស្ថានភាពមនុស្សធម៌ អាទិភាពនៃការគ្រប់គ្រងហានិភ័យគ្រោះមហន្តរាយ និងកិច្ចសហប្រតិបត្តិការដែលកំពុងបន្តរវាង គ.ជ.គ.ម. និងដៃគូអភិវឌ្ឍន៍។ជំនួបនេះបានប្រព្រឹត្តទៅនៅសាលប្រជុំ គ.ជ.គ.ម. ដោយមានការអញ្ជើញចូលរួមពី លោកស្រី ឃ្យុងណាន់ ផាក (Kyung-nan Park) នាយិកាអង្គការកម្មវិធីស្បៀងអាហារពិភពលោក (WFP) ប្រចាំនៅកម្ពុជា និងសហការី។ក្នុងជំនួបនេះ អគ្គលេខាធិការដ្ឋាន គ.ជ.គ.ម. បានធ្វើបទបង្ហាញអំពីយន្តការ និងអាទិភាពសំខាន់ៗនៃការគ្រប់គ្រងគ្រោះមហន្តរាយនៅកម្ពុជា ដោយផ្តោតជាសំខាន់លើការពង្រឹងភាពធន់របស់សហគមន៍ និងការបង្កើនសមត្ថភាពរបស់មូលដ្ឋាន ដើម្បីឱ្យប្រជាពលរដ្ឋអាចត្រៀមខ្លួន និងឆ្លើយតបបានទាន់ពេលវេលា។អាទិភាពសំខាន់ៗដែលបានលើកឡើង រួមមាន ការរៀបចំផែនការត្រៀមបម្រុងកម្រិតឃុំ ការលើកកម្ពស់ការប្រកាសឱ្យដឹងមុនសម្រាប់ទាំងអស់គ្នា ការពង្រឹងប្រព័ន្ធប្រកាសឱ្យដឹងមុននៅកម្រិតមូលដ្ឋាន ប្រព័ន្ធអង្កេតតាមដានស្ថានការណ៍គ្រោះមហន្តរាយ (PRISM) និងការកសាងទីទួលសុវត្ថិភាព ព្រមទាំងវិធានការសំខាន់ៗផ្សេងទៀតសម្រាប់កាត់បន្ថយផលប៉ះពាល់ពីគ្រោះមហន្តរាយលើជីវភាព និងសុខុមាលភាពរបស់ប្រជាពលរដ្ឋ។ភាគីសហរដ្ឋអាមេរិកបានសម្តែងការវាយតម្លៃខ្ពស់ចំពោះការដឹកនាំ និងកិច្ចខិតខំប្រឹងប្រែងរបស់ គ.ជ.គ.ម. ក្នុងការពង្រឹងភាពជាដៃគូជាមួយស្ថាប័នជាតិ អង្គការអន្តរជាតិ និងដៃគូពាក់ព័ន្ធ ដើម្បីលើកកម្ពស់ភាពធន់របស់កម្ពុជា ចំពោះហានិភ័យគ្រោះមហន្តរាយ។លោក ម៉ៃឃើល រុននីង បានបញ្ជាក់ថា រដ្ឋាភិបាលសហរដ្ឋអាមេរិកបានបន្តផ្តល់ការគាំទ្រដល់ការងារគ្រប់គ្រងហានិភ័យគ្រោះមហន្តរាយនៅកម្ពុជា តាមរយៈអង្គការកម្មវិធីស្បៀងអាហារពិភពលោក (WFP) ដោយផ្តោតលើអាទិភាពសំខាន់ពីរ គឺ៖ ទី១). ការលើកកម្ពស់សមត្ថភាពស្ថាប័នក្នុងការគ្រប់គ្រងហានិភ័យគ្រោះមហន្តរាយ និងទី២). ការលើកកម្ពស់ការឆ្លើយតបតាមរយៈប្រព័ន្ធគាំពារសង្គម។ជាមួយគ្នានេះ ក្រុមការងារអង្គភាពគ្រប់គ្រងគម្រោងរបស់ គ.ជ.គ.ម. និងអង្គការកម្មវិធីស្បៀងអាហារពិភពលោក នឹងបន្តពិភាក្សាលម្អិតអំពីផែនការ និងយន្តការអនុវត្តគម្រោងដែលទទួលបានការគាំទ្រពីរដ្ឋាភិបាលសហរដ្ឋអាមេរិក ដើម្បីធានាថា ការគាំទ្រនេះនឹងទទួលបានលទ្ធផលជាក់ស្តែង និងមានប្រយោជន៍ដល់ការពង្រឹងសមត្ថភាពថ្នាក់ជាតិ និងភាពធន់របស់សហគមន៍កម្ពុជា។ជំនួបនេះបានបង្ហាញពីការបន្តពង្រឹងកិច្ចសហប្រតិបត្តិការ និងភាពជាដៃគូរវាង គ.ជ.គ.ម. សហរដ្ឋអាមេរិក និង WFP ក្នុងការរួមចំណែកដល់ការកាត់បន្ថយហានិភ័យ ការត្រៀមបម្រុង និងការឆ្លើយតបប្រកបដោយប្រសិទ្ធភាពចំពោះគ្រោះមហន្តរាយ៕
ព័ត៌មានគួរចាប់អារម្មណ៍
គណៈរដ្ឋមន្ត្រីប្រជុំពិនិត្យរបាយការណ៍វឌ្ឍនភាពនៃការអនុវត្តវិធានការគន្លឹះក្នុងការពង្រឹងសមត្ថភាពរដ្ឋបាលសាធារណៈ ដើម្បីជំរុញនិងលើកកម្ពស់ការអនុវត្តការងារកែទម្រង់រដ្ឋបាលសាធារណៈ ឱ្យមានប្រសិទ្ធភាពខ្ពស់ ()
សម្ដេចតេជោ ហ៊ុន សែន ជំរុញឲ្យកម្ពុជា-វៀតណាម សហការគ្នាធានាសន្ដិសុខតាមព្រំដែន រួមគ្នាប្រយុទ្ធនឹងព័ត៌មានក្លែងក្លាយ ពិសេសចៀសវាងកុំឲ្យមានការប្រើប្រាស់កម្លាំងក្នុងប្រទេសណាមួយប្រឆាំងនឹងប្រទេសមួយទៀត រវាងកម្ពុជា-ឡាវ-វៀតណាម ()
សម្តេចតេជោ ហ៊ុន សែន សម្តែងការទទួលខុសត្រូវ និងសូមអភ័យទោសប្រជាពលរដ្ឋទូទាំងប្រទេស ដោយសារជឿទុកចិត្តប្រទេសថៃពេក និងមិនបានត្រៀមខ្លួនគ្រប់គ្រាន់ សម្រាប់ការប្រយុទ្ធ ()
សម្តេចធិបតី ហ៊ុន ម៉ាណែត អញ្ជើញបំពេញទស្សនកិច្ចផ្លូវការ នៅសាធារណរដ្ឋសង្គមនិយមវៀតណាម ()
អភិបាលខេត្តប៉ៃលិន អញ្ជើញបួងសួងសុំសេចក្តីសុខចម្រើនក្នុងឱកាសលើករូបសំណាកព្រះវិស្ណុធ្វើពីថ្មភ្នំដាក់លើរង្វង់មូលថ្មី ដើម្បីលើកកម្ពស់សោភណភាព និងសុវត្ថិភាព ក្នុងការធ្វើដំណើររបស់ប្រជាពលរដ្ឋ ()
វីដែអូ