(ភ្នំពេញ)៖ ក្នុងស្មារតីសាមគ្គីភាពជាតិ និងការដឹងគុណចំពោះវីរកងទ័ពដែលកំពុងបំពេញភារកិច្ចការពារបូរណភាពទឹកដីនៅតាមតំបន់ព្រំដែន ក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវដល់ថ្នាក់ដឹកនាំ មន្ត្រីរាជការ គ្រឹះស្ថានក្រោមឱវាទ រោងចក្រ សហគ្រាស និយោជក កម្មករនិយោជិត ដៃគូពាក់ព័ន្ធ និងសប្បុរសជន ចូលរួមបរិច្ចាគតាមសទ្ធា និងលទ្ធភាព ដើម្បីផ្តល់កម្លាំងចិត្ត និងការគាំទ្រដល់វីរកងទ័ពនៅជួរមុខ។ក្រសួងបានកំណត់យកថ្ងៃទី៣ ខែតុលា ឆ្នាំ២០២៦ ដើម្បីនាំយកថវិកា សម្ភារៈ និងអំណោយដែលទទួលបានពីការចូលរួមបរិច្ចាគ ទៅប្រគល់ជូនបងប្អូនវីរកងទ័ព និងកងកម្លាំងដែលកំពុងបំពេញភារកិច្ចនៅជួរមុខ។ នេះបើយោងតាមសេចក្តីអំពាវនាវរបស់ក្រសួងដែលបានចេញផ្សាយនៅថ្ងៃទី១៩ ខែសីហា ឆ្នាំ២០២៦។លោក ស៊ុន មេសា អ្នកនាំពាក្យក្រសួងការងារនិងបណ្ដុះបណ្ដាលវិជ្ជាជីវៈ បានលើកឡើងថា៖ «បងប្អូនវីរកងទ័ពនៅជួរមុខកំពុងបំពេញភារកិច្ចដ៏មានតម្លៃក្នុងការការពារបូរណភាពទឹកដី។ ក្រោមគំនិតផ្តួចផ្តើមរបស់ឯកឧត្តមរដ្ឋមន្ត្រី យើងនៅជួរក្រោយមិនភ្លេចពួកគាត់ទេ។ ការចូលរួមរបស់យើង ទោះតិចក្តី ច្រើនក្តី គឺជាកម្លាំងចិត្តដល់បងប្អូននៅជួរមុខ និងជាសារបញ្ជាក់ថា ពួកគាត់មិននៅឯកោទេ ព្រោះមានប្រជាពលរដ្ឋខ្មែរនៅជួរក្រោយគាំទ្រពួកគាត់ជានិច្ច»។លោកបន្តថា ការចូលរួមនេះមិនត្រឹមតែជាការផ្តល់ថវិកា ឬសម្ភារៈប៉ុណ្ណោះទេ ប៉ុន្តែជាការបង្ហាញពីការគោរព ការដឹងគុណ និងសាមគ្គីភាពរបស់ប្រជាជនខ្មែរ ចំពោះអ្នកដែលកំពុងបំពេញភារកិច្ចនៅជួរមុខ។«ជួរមុខការពារបូរណភាពទឹកដី ជួរក្រោយជាកម្លាំងគាំទ្រ។ យើងនៅទីណាក៏ដោយ យើងអាចចូលរួមតាមលទ្ធភាព ដើម្បីបង្ហាញថា ខ្មែរយើងរួមគ្នាជាកម្លាំងតែមួយ» នេះបើតាមការបញ្ជាក់របស់លោក ស៊ុន មេសា៕
ព័ត៌មានគួរចាប់អារម្មណ៍
គណៈរដ្ឋមន្ត្រីប្រជុំពិនិត្យរបាយការណ៍វឌ្ឍនភាពនៃការអនុវត្តវិធានការគន្លឹះក្នុងការពង្រឹងសមត្ថភាពរដ្ឋបាលសាធារណៈ ដើម្បីជំរុញនិងលើកកម្ពស់ការអនុវត្តការងារកែទម្រង់រដ្ឋបាលសាធារណៈ ឱ្យមានប្រសិទ្ធភាពខ្ពស់ ()
សម្ដេចតេជោ ហ៊ុន សែន ជំរុញឲ្យកម្ពុជា-វៀតណាម សហការគ្នាធានាសន្ដិសុខតាមព្រំដែន រួមគ្នាប្រយុទ្ធនឹងព័ត៌មានក្លែងក្លាយ ពិសេសចៀសវាងកុំឲ្យមានការប្រើប្រាស់កម្លាំងក្នុងប្រទេសណាមួយប្រឆាំងនឹងប្រទេសមួយទៀត រវាងកម្ពុជា-ឡាវ-វៀតណាម ()
សម្តេចតេជោ ហ៊ុន សែន សម្តែងការទទួលខុសត្រូវ និងសូមអភ័យទោសប្រជាពលរដ្ឋទូទាំងប្រទេស ដោយសារជឿទុកចិត្តប្រទេសថៃពេក និងមិនបានត្រៀមខ្លួនគ្រប់គ្រាន់ សម្រាប់ការប្រយុទ្ធ ()
សម្តេចធិបតី ហ៊ុន ម៉ាណែត អញ្ជើញបំពេញទស្សនកិច្ចផ្លូវការ នៅសាធារណរដ្ឋសង្គមនិយមវៀតណាម ()
អភិបាលខេត្តប៉ៃលិន អញ្ជើញបួងសួងសុំសេចក្តីសុខចម្រើនក្នុងឱកាសលើករូបសំណាកព្រះវិស្ណុធ្វើពីថ្មភ្នំដាក់លើរង្វង់មូលថ្មី ដើម្បីលើកកម្ពស់សោភណភាព និងសុវត្ថិភាព ក្នុងការធ្វើដំណើររបស់ប្រជាពលរដ្ឋ ()
វីដែអូ