កំពត ៖ នៅព្រឹកថ្ងៃទី១៤ ខែឧសភា ឆ្នាំ២០២៦ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋ ស្ដី ទី កម្ពុជា បានអញ្ជើញចុះជួបសំណេះសំណាលជាមួយប្រឹក្សា ខេត្ត ក្រុង ស្រុក ខណ្ឌ ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្ដស្វាយរៀង ដែលកម្មវិធីនេះប្រព្រឹត្ដិឡើងនៅបរិវេណសកលវិទ្យាល័យស្វាយរៀង ដែលមានសមាសភាពចូលរួមជាង១៣០០នាក់។

ក្នុងឱកាសជំនួប អភិបាលខេត្ដស្វាយរៀង លោក ប៉េង ពោធិ៍សា ឡើងរាយការណ៍ពីស្ថានភាពទូទៅ និងសមិទ្ធផលសំខាន់ៗដែលខេត្ដទាំងពីរសម្រេចបាននាពេលកន្លងមក ដោយនេះគឺជាជំនួបទី៦ ហើយបន្ទាប់ពីខេត្ដកំពង់ចាម ត្បូងឃ្មុំ កំពង់ស្ពឺ តាកែវ កំពត កែប ដែល សម្ដេចតេជោ ហ៊ុន សែន បានបន្ដមកចុះជួបសំណេះសំណាលជាមួយមន្ដ្រីក្រុមប្រឹក្សារាជធានី ខេត្ត ក្រុង ស្រុក ខណ្ឌ និងឃុំ សង្កាត់ នៅមូលដ្ឋានផ្ទាល់។
យោងតាមរបាយការណ៍របស់ លោក ប៉េង ពោធិ៍សា បានឲ្យដឹងថា មន្ត្រីរាជការ នៅក្នុងខេត្តមានមន្ត្រីរាជការ សរុប ៦.៧៨៣នាក់ ស្រី ២.៦០៧នាក់ ក្នុងនោះ ៖ មន្ត្រីរាជការទូទៅ ចំនួន ១.៣៦៨នាក់ ស្រី ៤៧០នាក់ ក្របខណ្ឌគ្រូបង្រៀន ចំនួន ៤.៥៤០នាក់ ស្រី ១.៦៨៩នាក់ ក្របខណ្ឌសុខាភិបាល ចំនួន ៨៧៥នាក់ ស្រី ៤៤៨នាក់។ ប្រជាជនភាគច្រើនប្រកបមុខរបរកសិកម្មប្រមាណ ៥១,៥% ឧស្សាហកម្ម និងសេវាកម្ម ៤៨% និងមុខរបរសិប្បកម្មប្រមាណ ០,៥%។

សូមជម្រាបជូនថា តាមរយៈ ការចុះជួបសំណេះសំណាលជាមួយន្ដ្រីក្រុមប្រឹក្សារាជធានី ខេត្ត ក្រុង ស្រុក ខណ្ឌ និងឃុំ សង្កាត់ បួនខេត្ដកន្លងទៅនេះ សម្ដេចតេជោ ហ៊ុន សែន ប្រមុខរដ្ឋ ស្ដីទី តែងតែបានក្រើនរំលឹកទៅកាន់មន្ដ្រីមូលដ្ឋានឱ្យត្រូវយកចិត្ដទុកដាក់ពីសុខទុក្ខ តម្រូវការចំបាច់ ផ្សេងៗ របស់ប្រជាពលរដ្ឋ ពិសេសការបម្រើសេវាសាធារណៈឱ្យកាន់តែមានប្រសិទ្ធភាព ដោយជៀសវាងអោយបាននូវការថ្នាំងថ្នាក់រវាងប្រជាជន និងមន្រ្ដីនៅមូលដ្ឋាន។
ការចុះជួបសំណេះសំណាលនេះជាសកម្មភាពដែលសម្ដេចតេជោ ហ៊ុន សែន តែងតែអនុវត្ដជាប់ជាប្រចាំ ដើម្បីជួបផ្ទាល់ដឹងសុខទុក្ខ និងស្ដាប់នូវរបាយការណ៍ពីថ្នាក់ក្រុមប្រឹក្សារាជធានី ខេត្ត ក្រុង ស្រុក ខណ្ឌ និងឃុំ សង្កាត់ផ្ទាល់ ដើម្បីក្រើនរំលឹក និងជំរុញដល់មន្ត្រីនៅមូលដ្ឋានឱ្យបង្កើនការយកចិត្តទុកដាក់លើការផ្តល់សេវាសាធារណៈ និងដោះស្រាយបញ្ហាជូនប្រជាពលរដ្ឋ។

គោលបំណងសំខាន់មួយទៀតគឺពង្រឹងភាពជិតស្និទ្ធ និងការធ្វើគណនេយ្យភាពរវាងសមាជិកព្រឹទ្ធសភាជាមួយអង្គបោះឆ្នោត ជាពិសេសក្រុមប្រឹក្សាឃុំ សង្កាត់ ដែលជាអ្នកបោះឆ្នោតជ្រើសរើសសមាជិកព្រឹទ្ធសភា។
តាមការគ្រោងទុក សម្ដេចតេជោ ហ៊ុន សែន នឹងបន្ដទៅជួបសំណេះសំណាលជាមួយមន្ត្រីរាជការជាសមាជិកក្រុមប្រឹក្សា ខេត្ត ក្រុង ស្រុក ខណ្ឌ និងឃុំ សង្កាត់ នៅខេត្ដផ្សេងៗទៀតទូទាំងប្រទេសកម្ពុជា៕