សម្តេចធិបតី៖ រាជរដ្ឋាភិបាលតែងតែចាត់ទុក ការអភិវឌ្ឍវិស័យការងារ និង បណ្ដុះបណ្ដាលវិជ្ជាជីវៈ ជាអាទិភាពគោលនយោបាយគន្លឹះ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា រាជរដ្ឋាភិបាលតែងតែចាត់ទុក «ការអភិវឌ្ឍវិស័យការងារ និង បណ្ដុះបណ្ដាលវិជ្ជាជីវៈ» ជាអាទិភាពគោលនយោបាយគន្លឹះ។ ក្នុង«យុទ្ធសាស្ត្របញ្ចកោណ-ដំណាក់កាលទី១», រាជរដ្ឋាភិបាល នីតិកាលទី៧ នៃរដ្ឋសភា បានដាក់ចេញនូវគោលដៅយុទ្ធសាស្ត្រចំនួន ៥, ក្នុងនោះការបង្កើតការងារឱ្យបានកាន់តែច្រើន, ទាំងបរិមាណ និង គុណភាព, ជូនដល់ប្រជាពលរដ្ឋកម្ពុជាជាពិសេស សម្រាប់យុវជន ត្រូវបានកំណត់ជាគោលដៅយុទ្ធសាស្ត្រទី២។
សម្តេចធិបតីលើកឡើងបែបនេះ ក្នុងឱកាសអញ្ជើញជួបសំណេះសំណាលជាមួយថ្នាក់ដឹកនាំសហជីព សមាគមសេដ្ឋកិច្ចក្រៅប្រព័ន្ធ នៅព្រឹកថ្ងៃទី២៦ ខែមេសា ឆ្នាំ ២០២៦នេះ។
សម្ដេចមធិបតី បន្តថា ជាលទ្ធផលបច្ចុប្បន្នមានកម្មករនិយោជិតក្នុងប្រព័ន្ធដែលបានចុះបញ្ជីត្រឹមត្រូវប្រមាណ ២,៣ លាននាក់ ខណៈដែល មានកម្លាំងពលកម្មរាប់លាននាក់ទៀត ពុំទាន់បានចូលក្នុងប្រព័ន្ធ និង ពុំទាន់អាចទទួលបានអត្ថប្រយោជន៍ជាច្រើន ដែលរាជរដ្ឋាភិបាលបានខិតខំរៀបចំផ្ដល់ជូន តាមរយៈយន្តការផ្សេងៗ។
សម្ដេចបន្ថែមថា ទន្ទឹមនេះ, គិតត្រឹមត្រីមាសទី១ ឆ្នាំ២០២៦, មានអង្គការវិជ្ជាជីវៈ ចំនួន ៦ ៩២០ បានចុះបញ្ញិកា, ក្នុងនោះ សហភាពសហជីព ចំនួន ៤៣, សហព័ន្ធសហជីព ចំនួន ២៨៥, សហជីពមូលដ្ឋាន ចំនួន ៦ ៥៧៩, និង សមាគមនិយោជកចំនួន ១៣, ស្របពេលដែលវិវាទការងារប្រមាណ ៩៧,៩២% ត្រូវបានដោះស្រាយ នៅកម្រិតក្រសួង និង ក្រុមប្រឹក្សាអាជ្ញាកណ្តាល៕
![]()
![]()
![]()