សម្ដេចធិបតី ណែនាំក្រសួងសាធារណការ និងដឹកជញ្ជូន បន្តជំរុញប្រសិទ្ធភាពនៃការដឹកជញ្ជូនផ្លូវទឹកទន្លេ-សមុទ្រ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបានណែនាំក្រសួងសាធារណការ និងដឹកជញ្ជូន បន្តជំរុញប្រសិទ្ធភាពនៃការដឹកជញ្ជូនផ្លូវទឹកទន្លេ-សមុទ្រ, តាមរយៈការតភ្ជាប់ទន្លេ មេ ជាមួយដៃទន្លេ, បឹង, ស្ទឹង, ព្រែកនិងប្រឡាយ, ឆ្ពោះទៅកាន់សមុទ្រ ដើម្បី ផ្សារភ្ជាប់ទីក្រុង, ទីជនបទនិងតំបន់តាមដងទន្លេ ស្ទឹង ព្រែក ជាមួយតំបន់ផលិតកម្ម, កសិកម្ម និងទេសចរណ៍។
សម្ដេចធិបតីលើកឡើងបែបនេះ ក្នុងឱកាសអញ្ជើញជាអធិបតីបើកការដ្ឋានគម្រោងគ្រប់គ្រងធនធានទឹកចម្រុះហ្វូណនតេជោកំណាត់ទី២ ប្រវែង១៥១,៦គីឡូម៉ែត្រ (ព្រែកពោធិ៍ ខេត្តកណ្ដាល-សមុទ្រ ខេត្តកែប នៅព្រឹកថ្ងៃទី១១ ខែមេសា ឆ្នាំ២០២៦នេះ។
សម្តេចធិបតី ណែនាំឱ្យបន្តពង្រឹងគុណភាព, សមត្ថភាព និង សក្តានុពល នៃវិស័យដឹកជញ្ជូនផ្លូវទឹកនៅកម្ពុជា ឱ្យក្លាយជាឧស្សាហកម្មដឹកជញ្ចូនផ្លូវទឹក និងកំពង់ផែពិតប្រាកដ, ព្រម ទាំងត្រូវជំរុញការប្រើប្រាស់បច្ចេកវិទ្យាឆ្លាតវៃ ក្នុងប្រព័ន្ធហេដ្ឋារចនាសម្ព័ន្ធដឹកជញ្ជូនផ្លូវទឹក និងកំពង់ផែ។
ជាមួយគ្នានេះ សម្តេចនាយករដ្ឋមន្ត្រីក៏បានណែនាំឱ្យជំរុញឱ្យការដឹកជញ្ជូនធុនធ្ងន់ផ្លាស់ប្តូរពីផ្លូវថ្នល់មកផ្លូវទឹក ឬផ្លូវដែក ដើម្បី, ម៉្យាងកាត់បន្ថយការខូចខាតផ្លូវថ្នល់, ការកកស្ទះចរាចរណ៍, គ្រោះថ្នាក់ចរាចរណ៍ និងម៉្យាងទៀតកាត់បន្ថយថ្លៃដឹកជញ្ជូន និង ការបំភាយឧស្ម័នផ្ទះកញ្ចក់៕
![]()
![]()
![]()