ភ្នំពេញ៖ អ្នកឧកញ៉ា គិត ម៉េង បានថ្លែងថា ការកើនឡើងនៃជម្លោះរវាងសហរដ្ឋអាម៉េរិក អ៊ីស្រាអែល និងអ៊ីរ៉ង់ បានបង្កឱ្យមានការផ្លាស់ប្តូរសេដ្ឋកិច្ចពិភពលោក ដែលកំណើនសេដ្ឋកិច្ចរបស់អាស៊ាន នឹងត្រូវប្រឈមដោយផ្ទាល់នៅឆ្នាំ២០២៦ ដោយអស្ថិរភាពនេះកាន់តែមានភាពធ្ងន់ធ្ងរឡើង។ការថ្លែងបែបនេះរបស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា ក្នុងពិធីបើកកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា, ព្រមទាំងតំណាងក្រសួង-ស្ថាប័នរដ្ឋ និងអ្នកធុរកិច្ចជាតិ និងអន្តរជាតិជាច្រើនរូបផងដែរ នៅព្រឹកថ្ងៃទី៤ ខែមីនា ឆ្នាំ២០២៦ នាសណ្ឋាគារសូហ្វីតែល ភ្នំពេញ ភូគីត្រា។ជុំវិញការកើនឡើងនៃជម្លោះនៅតំបន់មជ្ឈិមបូព៌ានេះដែរ, អ្នកឧកញ៉ា គិត ម៉េង មានប្រសាសន៍ថា តម្លៃប្រេងឆៅប្រភេទ Brent កើនឡើងខ្ពស់ និងការរំខាននៅក្នុងច្រកសមុទ្រ Hormuz ដែលជាចំណុចឆ្លងកាត់សម្រាប់ការដឹកជញ្ជូនប្រេង ២០% របស់ពិភពលោក អាជីវកម្មក្នុងតំបន់របស់យើងត្រូវប្រឈមនឹងសម្ពាធអតិផរណាភ្លាមៗ។អ្នកឧកញ៉ា គិត ម៉េង បានគូសបញ្ជាក់ថា៖ «យើងរៀបចំកិច្ចប្រជុំកំពូលនេះ នៅដំណាក់កាលដ៏សំខាន់មួយសម្រាប់សេដ្ឋកិច្ចពិភពលោក។ យើងកំពុងមើលឃើញសម័យកាលនៃការប្រកួតប្រជែងជាយុទ្ធសាស្ត្រកាន់តែខ្លាំងរវាងមហាអំណាចធំៗ ដែលអាស៊ានកំពុងតែធ្វើដំណើរឆ្លងកាត់រលកសម្ពាធនេះ ដែលកើតចេញពីភាពតានតឹងរវាងសហរដ្ឋអាម៉េរិក និងចិន»។អ្នកឧកញ៉ា គិត ម៉េង សង្កត់ធ្ងន់ថា រលកថ្មីៗនៃវិធានការពន្ធឯកតោភាគី និងការឆ្លើយតបជាបន្តបន្ទាប់ បានធ្វើឱ្យសេដ្ឋកិច្ចកាន់តែការបែកបាក់ខ្លាំងឡើង ដោយបានបង្កើនល្បឿននៃគម្លៀត និងបង្ហាញពីការផ្លាស់ប្តូរបន្តិចម្តងៗ ងាកចេញពីប្រព័ន្ធពាណិជ្ជកម្មពហុភាគី ដែលអាចព្យាករបាននិងផ្អែកលើបទបញ្ញត្តិច្បាប់ ឆ្ពោះទៅរកសណ្តាប់ធ្នាប់សកលមួយ ដែលត្រូវបានជំរុញដោយប្រតិបត្តិការនិងផលប្រយោជន៍។អ្នកឧកញ៉ា គិត ម៉េង បន្ថែមទៀតថា នៅក្នុងបរិយាកាសនេះ ចំណុចខ្លាំងរបស់អាស៊ានមិនមែនស្ថិតនៅលើការជ្រើសរើសភាគីណានោះទេ ប៉ុន្តែស្ថិតនៅលើការរក្សាភាពបើកចំហ អព្យាក្រឹតភាព និងជាមជ្ឈភាព។ ភារកិច្ចរួមរបស់យើង គឺរក្សាអាស៊ានជាកម្លាំងដែលមានស្ថិរភាព ដែលជាកម្លាំងជំរុញការសន្ទនា រក្សាទំនាក់ទំនងទីផ្សារ និងធានាថា កិច្ចសហប្រតិបត្តិការសេដ្ឋកិច្ចនៅតែត្រូវបានគ្រប់គ្រងដោយភាពត្រឹមត្រូវយុត្តិធម៌ តម្លាភាព និងការគោរពគ្នាទៅវិញទៅមក។ ដូច្នេះភាពពាក់ព័ន្ធរបស់អាស៊ាន មិនដែលមានសារៈសំខាន់ជាងពេលនេះទេ ហើយការទទួលខុសត្រូវរបស់យើងក៏មិនដែលមានភាពស៊ីជម្រៅជាងនេះដែរ៕
ព័ត៌មានគួរចាប់អារម្មណ៍
ឧកញ៉ា ឡេង សុខគា ដឹកនាំប្រតិភូសភាពាណិជ្ជកម្មកម្ពុជា ទស្សនា និងស្វែងយល់ពីបច្ចេកវិទ្យាកែច្នៃ និងវេចខ្ចប់នៃបណ្តាក្រុមហ៊ុនមួយចំនួន ដែលបានកំពុងដាក់តាំងបង្ហាញក្នុងកម្មវិធីពិព័រណ៍អន្តរជាតិក្រុងហូជីមីញ ()
ព្រឹកនេះ សម្តេចបវរធិបតី ហ៊ុន ម៉ាណែត ទទួលជួបលោកជំទាវ Zou Jiayi ប្រធាន និងជាប្រធានក្រុមប្រឹក្សាភិបាល នៃធនាគារវិនិយោគហេដ្ឋារចនាសម្ព័ន្ធអាស៊ី (AIIB) ()
រដ្ឋមន្ត្រីទេសចរណ៍៖ វិស័យទេសចរណ៍ គឺខ្វះព័ត៌មានមិនបានជាដាច់ខាត ()
កម្ពុជាបណ្ដេញជនបរទេសខុសច្បាប់ជាង ១,៥០០នាក់ បន្ថែមទៀតចេញពីកម្ពុជា ពាក់ព័ន្ធករណីឆបោកអនឡាញ ()
ព្រឹកនេះ សម្តេចបវរធិបតី ហ៊ុន ម៉ាណែត ទទួលជួបលោកស្រី Rabab Fatima អគ្គលេខាធិការរង អង្គការសហប្រជាជាតិ និងជាតំណាងជាន់ខ្ពស់សម្រាប់ប្រទេសអភិវឌ្ឍន៍តិចតួច ប្រទេសកំពុងអភិវឌ្ឍន៍ គ្មានព្រំដែនជាប់សមុទ្រ និងប្រទេសដីកោះកំពុងអភិវឌ្ឍន៍តូច ()
វីដែអូ