វៀតណាម៖ នាយករដ្ឋមន្ត្រីវៀតណាម លោក ផាម មិញជិញ (Pham Minh Chinh) បានចាកចេញពីប្រទេសកាលពីថ្ងៃទី២២ ខែមីនា ដើម្បីទៅបំពេញទស្សនកិច្ចជាផ្លូវការនៅប្រទេសរុស្ស៊ី។ ក្នុងដំណើរទស្សនកិច្ចនេះ មេដឹកនាំនៃប្រទេសទាំងពីរនឹងចុះហត្ថលេខាលើកិច្ចព្រមព្រៀងសំខាន់ៗជាច្រើន រួមទាំងកិច្ចសហប្រតិបត្តិការលើវិស័យប្រេង និងឧស្ម័នផងដែរ ។ដំណើរទស្សនកិច្ចរបស់លោក ផាម មិញជិញ ទៅកាន់ប្រទេសមហាអំណាចផលិតប្រេងមួយនេះ ចាប់ពីថ្ងៃទី២២ ដល់ថ្ងៃទី២៥ ខែមីនា កើតឡើងចំពេលដែលវៀតណាមកំពុងខិតខំប្រឹងប្រែងពង្រឹងការស្តុកទុកប្រេងឥន្ធនៈរបស់ខ្លួន បន្ទាប់ពីមានការរំខានដល់ការផ្គត់ផ្គង់ទូទាំងពិភពលោក ដែលបង្កឡើងដោយសង្គ្រាមនៅតំបន់មជ្ឈិមបូព៌ា។ រដ្ឋាភិបាលវៀតណាមបញ្ជាក់ថា ដំណើរនេះនឹងផ្តោតលើការរឹតចំណងមិត្តភាពឱ្យកាន់តែស៊ីជម្រៅ និងពង្រីកកិច្ចសហប្រតិបត្តិការលើផ្នែកពាណិជ្ជកម្ម ការវិនិយោគ និងថាមពល ។សេចក្តីថ្លែងការណ៍ពីទីក្រុងហាណូយ បានឱ្យដឹងថា «ក្នុងដំណើរទស្សនកិច្ចនេះ នឹងត្រូវចុះហត្ថលេខាលើកិច្ចព្រមព្រៀងសំខាន់ៗមួយចំនួនទាក់ទងនឹងគម្រោងរោងចក្រថាមពលនុយក្លេអ៊ែរ ក៏ដូចជាកិច្ចសហប្រតិបត្តិការលើវិស័យថាមពល ប្រេង និងឧស្ម័ន»។ ប្រភពដដែលបានបន្ថែមថា កិច្ចសហប្រតិបត្តិការនេះនឹងត្រូវពង្រឹងលើគ្រប់វិស័យ ចាប់តាំងពីការជួញដូរ ការរុករក ការបូមប្រេង រហូតដល់ការបណ្តុះបណ្តាលធនធានមនុស្ស ។ចាប់តាំងពីសង្គ្រាមរវាងអាម៉េរិក-អ៊ីស្រាអ៊ែល ប្រឆាំងនឹងអ៊ីរ៉ង់បានផ្ទុះឡើងកាលពីចុងខែកុម្ភៈ វាបានធ្វើឱ្យតម្លៃប្រេងហក់ឡើងខ្ពស់ និងបង្កការភ័យខ្លាចពីកង្វះខាតប្រេងនៅទូទាំងពិភពលោក។ នៅប្រទេសវៀតណាម ដែលជាមជ្ឈមណ្ឌលផលិតកម្មដ៏ធំមួយ តម្លៃសាំងស៊ុបពែរ បានកើនឡើង ៥០% ខណៈតម្លៃប្រេងម៉ាស៊ូតបានហក់ឡើងដល់ ៧០% ឯណោះ ។តាមរបាយការណ៍ពីរដ្ឋធានីហាណូយ លោក ផាម មិញជិញ ក៏បានជជែកតាមទូរសព្ទនាពេលថ្មីៗនេះ ដើម្បីសុំជំនួយផ្នែកប្រេងឥន្ធនៈពីប្រទេសមួយចំនួនទៀត រួមមាន កាតា, គុយវ៉ែត, អាល់ហ្សេរី និងជប៉ុនជាដើម។ លោកមានគម្រោងជួបពិភាក្សាជាមួយសមភាគីរុស្ស៊ី លោក ម៉ៃខល មីស៊ីស្ទីន (Mikhail Mishustin) នៅថ្ងៃទី២៣ ខែមីនា។ យោងតាមរដ្ឋាភិបាលរុស្ស៊ី ថ្នាក់ដឹកនាំទាំងពីរនឹងជជែកពី «បញ្ហាពាណិជ្ជកម្មរុស្ស៊ី-វៀតណាម» ដោយផ្តោតសំខាន់លើការអនុវត្តគម្រោងរួមគ្នាក្នុងវិស័យថាមពល និងវិស័យផ្សេងៗទៀត ។គួររំឭកដែរថា ក្នុងដំណើរទស្សនកិច្ចរបស់លោក មីស៊ីស្ទីន (Mishustin) មកកាន់ទីក្រុងហាណូយកាលពីខែមករា ឆ្នាំ២០២៥ រុស្ស៊ីបានប្រកាសថាខ្លួន «ត្រៀមខ្លួនជាស្រេចក្នុងការចូលរួមស្ថាបនាឧស្សាហកម្មថាមពលនុយក្លេអ៊ែរជាតិនៅក្នុងប្រទេសវៀតណាម»។ កាលនោះ ប្រទេសទាំងពីរ ក៏បានចុះកិច្ចព្រមព្រៀងលើវិស័យថាមពលនុយក្លេអ៊ែររួចម្ដងមកហើយ ដោយលោក ផាម មិញជិញ បានបញ្ជាក់ថា វៀតណាមមានគោលដៅសាងសង់រោងចក្រថាមពលនុយក្លេអ៊ែរឱ្យបានក្នុងរយៈពេល ៥ ឆ្នាំខាងមុខ ៕
ព័ត៌មានគួរចាប់អារម្មណ៍
ឧកញ៉ា ឡេង សុខគា ដឹកនាំប្រតិភូសភាពាណិជ្ជកម្មកម្ពុជា ទស្សនា និងស្វែងយល់ពីបច្ចេកវិទ្យាកែច្នៃ និងវេចខ្ចប់នៃបណ្តាក្រុមហ៊ុនមួយចំនួន ដែលបានកំពុងដាក់តាំងបង្ហាញក្នុងកម្មវិធីពិព័រណ៍អន្តរជាតិក្រុងហូជីមីញ ()
ព្រឹកនេះ សម្តេចបវរធិបតី ហ៊ុន ម៉ាណែត ទទួលជួបលោកជំទាវ Zou Jiayi ប្រធាន និងជាប្រធានក្រុមប្រឹក្សាភិបាល នៃធនាគារវិនិយោគហេដ្ឋារចនាសម្ព័ន្ធអាស៊ី (AIIB) ()
រដ្ឋមន្ត្រីទេសចរណ៍៖ វិស័យទេសចរណ៍ គឺខ្វះព័ត៌មានមិនបានជាដាច់ខាត ()
កម្ពុជាបណ្ដេញជនបរទេសខុសច្បាប់ជាង ១,៥០០នាក់ បន្ថែមទៀតចេញពីកម្ពុជា ពាក់ព័ន្ធករណីឆបោកអនឡាញ ()
ព្រឹកនេះ សម្តេចបវរធិបតី ហ៊ុន ម៉ាណែត ទទួលជួបលោកស្រី Rabab Fatima អគ្គលេខាធិការរង អង្គការសហប្រជាជាតិ និងជាតំណាងជាន់ខ្ពស់សម្រាប់ប្រទេសអភិវឌ្ឍន៍តិចតួច ប្រទេសកំពុងអភិវឌ្ឍន៍ គ្មានព្រំដែនជាប់សមុទ្រ និងប្រទេសដីកោះកំពុងអភិវឌ្ឍន៍តូច ()
វីដែអូ