លោកឧបនាយករដ្ឋមន្ត្រី ស សុខា រដ្ឋមន្ត្រីមហាផ្ទៃ បានដាស់តឿនជាមុនទៅកាន់ម្ចាស់ទីតាំងស្នាក់នៅគ្រប់ប្រភេទ មិនថាសណ្ឋាគារ ផ្ទះសំណាក់ ឬម្ចាស់អគារស្នាក់នៅនានា ដែលមានជនបរទេសស្នាក់នៅ ត្រូវតែអនុវត្តកាតព្វកិច្ចរាយការណ៍ជូនសមត្ថកិច្ច ខណៈសមត្ថកិច្ច នឹងអនុវត្តការពិន័យ ចាប់ពីដើមខែមីនា ឆ្នាំ២០២៦នេះតទៅ។ការរម្លឹកនេះ បានធ្វើឡើងក្នុងកម្មវិធី ទិវាជាតិប្រយុទ្ធប្រឆាំងអំពើជួញដូរមនុស្ស លើកទី១៩ ក្រោមប្រធានបទ «យើងរួមគ្នាដើម្បីកម្ពុជា គ្មានអំពើជួញដូរមនុស្ស និងអំពើឆបោកតាមអនឡាញ» ប្រារព្ធនៅមជ្ឈមណ្ឌលសន្និបាត និងពិព័រណ៍កោះពេជ្រ នារសៀលថ្ងៃទី២៥ ខែកុម្ភៈ ឆ្នាំ២០២៦។ភ្ជាប់នឹងការរម្លឹកដាស់តឿននេះ លោកឧបនាយករដ្ឋមន្ត្រី ស សុខា ប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានចាត់ទុក ទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ ជាការបង្ហាញនូវជំហរឥតងាករេរបស់រាជរដ្ឋាភិបាល ក្នុងការគោរព និងការពារសិទ្ធិមនុស្សនៅកម្ពុជា ដោយមិនមានការរើសអើង ជាស្មារតីសាមគ្គីភាព និងជាការយកចិត្តទុកដាក់ចំពោះសុខសុវត្ថិភាព និងផលប្រយោជន៍របស់ប្រជាពលរដ្ឋ ក្នុងការប្រយុទ្ធប្រឆាំងនឹងអំពើជួញដូរមនុស្ស និងកលល្បិចដ៏ពិសពុលរបស់ជនល្មើស គួបផ្សំនឹងការឆបោកតាមបច្ចេកវិទ្យា (Online Scams) ដ៏ទំនើប ដែលអូសទាញមនុស្ស ឱ្យធ្លាក់ក្នុងភាពរងគ្រោះយ៉ាងធ្ងន់ធ្ងរ។លោក'បានសង្កត់ធ្ងន់ថា ជនបរទេសដែលស្នាក់នៅតាមទីតាំងនានាដោយពុំបានរាយការណ៍ទៅសមត្ថកិច្ចពីសំណាក់ម្ចាស់ទីតាំង ស្ថិតក្នុងចំណោមជនបរទេសដែលអាចសំងំប្រព្រឹត្តបទល្មើស។លោកឧបនាយករដ្ឋមន្ត្រី ស សុខា បានប្រកាសជាឱឡារិកថា រាជរដ្ឋាភិបាលកម្ពុជា នៅតែបន្តការប្តេជ្ញាចិត្តយ៉ាងពេញទំហឹង ក្នុងការការពារសុវត្ថិភាពប្រជាពលរដ្ឋ សន្តិសុខសង្គម និងសន្តិភាពជាតិ ឱ្យនៅស្ថិតស្ថេរយូរអង្វែងតទៅ ដោយលុបបំបាត់ឱ្យខាងតែបាននូវរាល់ឧក្រិដ្ឋកម្ម ដែលកើតមាននៅលើទឹកដីកម្ពុជា។ លោកការប្ដេជ្ញាចិត្តការពារប្រជាជនកម្ពុជា ក៏ដូចជាជនបរទេសទាំងឡាយណា ដែលបាននិងកំពុងស្នាក់នៅលើទឹកដីកម្ពុជា ឱ្យមានសុវត្ថិភាព និងទទួលបាននូវកិច្ចការពារតាមគោលការណ៍ច្បាប់ ដោយឥតរើសអើង និងមិនបណ្តែតបណ្តោយឱ្យបទល្មើស រីកធំធាត់ ក្លាយជាឧបសគ្គដល់ដំណើរការ នៃការអភិវឌ្ឍសង្គមជាតិ លើគ្រប់វិស័យ ដែលជាគោលដៅចម្បងរបស់ជាតិ ស្របតាមគោលនយោបាយ និងយុទ្ធសាស្រ្តបញ្ចកោណ ដែលបាន និងកំពុងអនុវត្តយ៉ាងរលូន ក្នុងដំណាក់កាលទី១ និងបន្តបន្ទាប់។សូមបញ្ជាក់ថា ក្នុងឆ្នាំ២០២៥ សមត្ថកិច្ចបានស្រាវជ្រាវរកឃើញ និងបង្ក្រាប ករណីជួញដូរមនុស្ស បានសរុបចំនួន ៧៩ករណី លើ២៨ករណី (បើប្រៀបធៀបទៅនឹងរយៈពេលដូចគ្នាក្នុងឆ្នាំ២០២៤ គឺកើនឡើងបីដង) ក្នុងនោះឃាត់ខ្លួនសង្ស័យសរុបបានចំនួន ១៣០នាក់ និងបង្ក្រាបបទល្មើសធ្វើអាជីវកម្មផ្លូវភេទ បាន១០១ករណី ឃាត់ខ្លួនជនសង្ស័យ ១៤៤នាក់។ នេះបើតាមរបាយការណ៍ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស។ទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ គឺជាយុទ្ធនាការដ៏ធំមួយ ដែលត្រូវបានប្រារព្ធធ្វើឡើងរៀងរាល់ឆ្នាំ ដើម្បីផ្សព្វផ្សាយការយល់ដឹង អំពី អំពើជួញដូរមនុស្ស ដែលបាន និងកំពុងក្លាយជាឧបសគ្គដ៏ធំ ក្នុងការកសាងនូវសន្តិសុខ សុវត្ថិភាពក្នុងតំបន់ និងក្នុងសកលលោក ដែលបានបំផ្លាញយ៉ាងធ្ងន់ធ្ងរនូវធនធានមនុស្ស ដែលជាកម្លាំងពលកម្មដ៏មានសក្តានុពល សម្រាប់ការអភិវឌ្ឍជាតិនៃបណ្តាប្រទេស ក្នុងតំបន់ និងក្នុងសកលលោក។ប្រមុខក្រសួងមហាផ្ទៃបានគូសបញ្ជាក់ថា សមិទ្ធផលដែលសម្រេចបាននេះ គឺកើតចេញពីការខិតខំប្រឹងប្រែងទាំងអស់គ្នា ក្នុងការចូលរួមសហការ និងស្មារតីលះបង់ខ្ពស់ ស្របពេលដែលពិភពលោក បាននិងកំពុងប្រឈមនឹងវិបត្តិដ៏ស្មុគស្មាញជាបន្តបន្ទាប់ ដូចជា បញ្ហាកូវីដ-១៩ គ្រោះធម្មជាតិ និងបម្រែបម្រួលអាកាសធាតុ ដែលបង្កឱ្យមានការខ្វះខាតស្បៀង ទីជម្រក និងសុវត្ថិភាព ព្រមទាំងបញ្ហាជម្លោះប្រដាប់អាវុធ ការបំផ្លាញទឹកដី និងបរិស្ថានកាន់តែធ្ងន់ធ្ងរ។ មិនត្រឹមតែប៉ុណ្ណោះ ប្រព័ន្ធផ្សព្វផ្សាយ និងបច្ចេកវិទ្យាកែច្នៃ បំប្លែងរូបភាព សំឡេងដែលបង្កឱ្យមានការភ័ន្តច្រឡំនិងបំពុលព័ត៌មាន ដែលធ្វើឱ្យប៉ះពាល់ដល់សង្គមជាតិ៕យោងតាមអនុក្រឹត្យលេខ ០៣ ចុះហត្ថលេខាដោយសម្ដេចមហាបវរធិបតី ហ៊ុន ម៉ាណែត កាលពីថ្ងៃទី ៥ ខែមករា ឆ្នាំ២០២៦ ម្ចាស់ទីតាំងរស់នៅប្រមូលផ្តុំឬអ្នកគ្រប់គ្រងទីតាំងរស់នៅប្រមូលផ្តុំ ដែលធ្វេសប្រហែសខកខានមិនបាន បំពេញកាតព្វកិច្ច ដូចមានចែងក្នុងមាត្រា ១៦នៃអនុក្រឹត្យនេះ ត្រូវផាកពិន័យជាប្រាក់ចំនួន ៤០០ ០០០រៀល ដោយមិនទាន់គិតដល់ព្យសនកម្មដែលកើតឡើងពីការធ្វេសប្រហែសនេះឡើយ។បើតាមអនុក្រឹត្យដដែល ម្ចាស់ទីតាំងរស់នៅប្រមូលផ្តុំឬអ្នកគ្រប់គ្រងទីតាំងរស់នៅប្រមូលផ្តុំ ដែលមានចេតនាលាក់បាំង និងអនុញ្ញាតឱ្យជនបរទេសដែលចូលមកកម្ពុជាដោយខុសច្បាប់ ស្នាក់នៅក្នុងទីតាំងស្ថិតនៅក្រោមការ ទទួលខុសត្រូវរបស់ខ្លួន ត្រូវផាកពិន័យជាប្រាក់ចំនួន ៤ ០០០ ០០០រៀល សម្រាប់ជនបរទេសម្នាក់ ដោយមិនទាន់គិតដល់ទោសព្រហ្មទណ្ឌដែលបានកំណត់ក្នុងច្បាប់ជាធរមានឡើយ៕
ព័ត៌មានគួរចាប់អារម្មណ៍
សម្តេច ស ខេង អញ្ជើញជាអធិបតីក្នុងកិច្ចប្រជុំផ្សព្វផ្សាយផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៦ ឆ្នាំ២០២៧ ()
ឯកឧត្តម សុខ លូ អញ្ជើញជាអធិបតីក្នុងកិច្ចប្រជុំស្ដីពីការពង្រឹងលើការសម្របសម្រួលព័ត៌មាន និងដោះស្រាយសាធារណមតិក្នុងបណ្ដាញសង្គមស្ថិតក្នុងដែនសមត្ថកិច្ចខេត្តបាត់ដំបង ()
អភិបាលរាជធានីភ្នំពេញ៖ គិតត្រឹមថ្ងៃទី១២ ខែឧសភា ឆ្នាំ២០២៦ គណបក្សប្រជាជនកម្ពុជារាជធានីភ្នំពេញ មានសមាជិកគណបក្សជាង៧៨ម៉ឺននាក់ ស្មើនឹងចំនួន ៧៨,៨១% នៃចំនួនប្រជាពលរដ្ឋ ក្នុងបញ្ជីបោះឆ្នោតសរុប ()
សម្តេចធិបតី ផ្ញើសារយ៉ាងម៉ឺងម៉ាត់ដល់អាជ្ញាធរមូលដ្ឋានឱ្យបង្ក្រាប Online Scams ឱ្យទាល់តែអស់ជាដាច់ខាត ពីព្រោះនេះគឺជាមុខមាត់របស់ប្រទេសជាតិ ()
សម្តេចធិបតី ណែនាំក្រសួងសុខាភិបាល ត្រូវបន្តខិតខំត្រៀមវិធានការបង្ការនិងទប់ស្កាត់នូវការផ្ទុះឡើងនៃជំងឺអេបូឡា និងវីរុសហាន់តា ()
វីដែអូ