បន្ទាយមានជ័យ៖​ កុមារភៀសសឹកមកពីភូមិជោគជ័យ​ និងភូមិព្រៃចាន់​ ដែលបានរត់ភៀសសឹកតាមឱពុកម្តាយ​ ដោយសារការរំលោភបំពានរបស់ថៃ​ ទៅនៅក្នុងបណ្ឌលភៀសសឹកវត្តចាន់ស៉ី​ ស្ថិតក្នុងឃុំកូប​ ស្រុកអូជ្រៅ​ ខេត្តបន្ទាយមានជ័យ​ បានចាប់ផ្តេីចូលរៀនហេីយនៅថ្ងៃទី៥​ ខែមករា​ ឆ្នាំ​២០២៦​ នៅតាមបន្ទប់រៀនពហុបំណងបណ្តោះអាសន្ន​ ដែលរៀបចំឡេីងដោយក្រសួងអប់រំ​ យុវជន​ និងកីឡា​ ខណៈផ្ទះសំបែង​ និងសាលារៀនរបស់ពួកគេត្រូវយោធាថៃហ៊ុមព័ទ្ធបន្លាសួស​ និងឃាំងទូរកុងតឺន័រ​ដោយខុសច្បាប់ក្រោយកិច្ចព្រមព្រៀងឈប់បាញ់។

លោក សុវណ្ណ សោភ័ណ នាយកសាលាបឋមសិក្សា ជោគជ័យ ដែលបានរត់ភៀសសឹកនៅជំរំភៀសសឹកវត្តចាន់ស៊ី ដែរនោះ​ បានឱ្យដឹងថា ការបើកថ្នាក់រៀនដំបូងនេះ ក្រោយពេលអាជ្ញាធរ និងមន្ទីរអប់រំ យុវជន និងកីឡា ក្រោមការគាំទ្រពីអង្គការ និងម្ចាស់ជំនួយនានា បានរៀបចំថ្នាក់រៀបជាតង់ និងសម្ភារសិក្សាសម្រាប់ការបង្រៀនបណ្ដោះអាសន្ន។ ថ្នាក់រៀនបណ្ដោះអាសន្ននេះត្រូវបានរៀបចំជាលើកដំបូងដែលមាន​ ១៤ថ្នាក់ ក្នុងនោះមានកម្រិតមត្តេយ្យសិក្សាចំនួន​ ៣ថ្នាក់ ក្រៅពីនោះជាថ្នាក់បឋមសិក្សា។

លោក សុវណ្ណ សោភ័ណ បានបញ្ជាក់ថា​ សិស្សចូលរៀននៅថ្ងៃដំបូងនេះមានចំនួន​ ២៨៦នាក់ ក្នុងចំណោមសិស្សសរុប​ ៤៥០នាក់ ដែលបានចុះឈ្មោះរៀនក្នុងបវេសនកាលឆ្នាំ២០២៥-២០២៦ នៅសាលាបឋមសិក្សាជោគជ័យ ដែលស្ថិតនៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ចំពោះសិស្សមិនទាន់មកអស់នោះទេ ដោយសារការបែកខ្ញែកទៅនៅតាមទីកន្លែងផ្សេងៗមិនទាន់មកជុំគ្នា។
លោកនាយកសាលាបានលេីកឡេីងយ៉ាងដូច្នេះថា​៖​ «សិស្សនៅទីនេះ គឺជាសិស្សភៀសសឹក តាមឪពុកម្ដាយ និងអាណាព្យាបាល ពីភូមិជោគជ័យ និងភូមិព្រៃចាន់ ដែលបានមកស្នាក់នៅមណ្ឌលសុវត្ថិភាព ស្ថិតនៅវត្តចាន់ស៊ី​ ឃុំកូប ស្រុកអូរជ្រៅ។ សម្រាប់សិស្សមកពីភូមិព្រៃចាន់ មិនទាន់បានដឹងពីតួលេខនៅឡើយទេ​ ខ្ញុំអំពាវនាវដល់ឪពុកម្ដាយ និងអាណាព្យាបាលសិស្សទាំងអស់យកកូនមកចុះឈ្មោះរៀននៅសាលាបណ្ដោះអាសន្ននេះឱ្យបានគ្រប់ៗគ្នា»។
ជាមួយគ្នានេះ​ អ្នកគ្រូ​ ឡុច​ ទ្រីយ៉ា​ ដែលកំពុងបង្ហាត់បង្រៀនកុមារៗ​ បានឱ្យដឹងថា​ អ្នកគ្រូក៏បានរត់ភៀសសឹកទៅរស់នៅក្នុងជំរំភៀសសឹកដូចកូនសិស្ស​ និងឱពុកម្តាយសិស្សផងដែរនោះ​ ថាអ្នកគ្រូក្រៅពីបង្រៀន​ ក៏បានអប់រំផ្លូវចិត្តដល់កុមារៗកុំឱ្យមានការភិតភ័យពីគ្រាប់ផ្លោងរបស់ថៃ​ តែត្រូវតាំងស្មារតីដេីម្បីរកន្លែងមានសុវត្ថិភាព​ និងត្រូវខិតខំសិក្សារៀនសូត្រអភិវឌ្ឍន៍ប្រទេសឱ្យរីកចម្រេីនកុំឱ្យថៃមាក់ងាយ។
ចំណែកសិស្សានុសិស្សបានឱ្យដឹងដែរថា​ ពួកគេមានការភ័យខ្លាចនៅពេដែលយោធាថៃផ្លោងគ្រាប់ដាក់ភូមិឋានរបស់ពួកគេ​ ហេីយពួកគេមិនចង់ជួបរឿនបបនេះឡេីយ​ និងចង់ត្រលប់ទៅរស់នៅក្នុងផ្ទះ​ និងសាលារៀនដូចដេីមវិញ​ មិនចង់រត់ភៀសសឹកដូចនេះទេ​ គឺមានការពិបាកខ្លាំងណាស់។

សូមបញ្ជាក់ថា​ ទាក់ទងនឹងបញ្ហានេះ​ ដោយមេីលឃេីញពីផលវិបាក​ មន្ទីរអប់រំ យុវជន និងកីឡា​ ខេត្តបន្ទាយមានជ័យ បានចេញសេចក្តីណែនាំស្តីពីការបើកដំណើរការបង្រៀន និងរៀនឡើងវិញ ក្នុងស្រុកថ្មពួក ស្រុកស្វាយចេក ស្រុកអូរជ្រៅស្រុកម៉ាឡៃ និងក្រុងប៉ោយប៉ែត ខេត្តបន្ទាយមានជ័យ នៅថ្ងៃទី៥ ខែមករា ឆ្នាំ២០២៦។ ចំពោះសាលាបឋមសិក្សាជោគជ័យ សាលាបឋមសិក្សា ព្រៃចាន់ (ស្រុកអូរជ្រៅ) សាលាបឋមសិក្សា បន្ទាយមានឫទ្ធិ និងអនុវិទ្យាល័យ បន្ទាយមានឬទ្ធិ (ស្រុកថ្មពួក) ពុំទាន់អាចដំណើរការបានទេរហូតមកដល់ពេលនេះ​ ប៉ុន្តែកំពុងគិតគួរដាក់ឱ្យដំណេីរការក្នុងពេលឆាប់ៗ៕