ថ្ងៃអាទិត្យ ទី២២ ខែវិច្ឆិការ ឆ្នាំ២០៥០
គេហទំព័រ ទូរទស្សន៍ភីស៊ីអិន ធីវីអនឡាញ
គណៈប្រតិភូសភាពាណិជ្ជកម្មកម្ពុជា ចុះទស្សនកិច្ចមជ្ឈមណ្ឌលសិប្បកម្មសច្ចៈ និងក្រុមហ៊ុនផលិតស្រាវីស្គី Holly Creek ដើម្បីស្វែងយល់ពីសក្តានុពលផលិតកម្មក្នុងស្រុក
Fri,20 November 2026 (Time 02:15 PM)
ដោយ ៖ (ចំនួនអ្នកអាន: 3នាក់)

ខេត្តសៀមរាប៖ ដើម្បីស្វែងយល់ពីការអភិវឌ្ឍជំនាញវិជ្ជាជីវៈ សក្តានុពលផលិតកម្ម និងឱកាសពង្រីកធុរកិច្ចក្នុងខេត្តសៀមរាប នារសៀលថ្ងៃទី១៩ ខែវិច្ឆិកា ឆ្នាំ២០២៦ ឧកញ៉ាបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា តំណាងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានបន្តដឹកនាំគណៈប្រតិភូពាណិជ្ជករ ចុះទស្សនកិច្ចនៅមជ្ឈមណ្ឌលបណ្តុះបណ្តាលសិប្បកម្មកម្ពុជា សច្ចៈ និងក្រុមហ៊ុន Holly Creek Whisky Co., Ltd. ក្នុងខេត្តសៀមរាប។

ក្នុងដំណើរទស្សនកិច្ចនៅមជ្ឈមណ្ឌលបណ្តុះបណ្តាលសិប្បកម្មកម្ពុជា សច្ចៈ គណៈប្រតិភូបានស្វែងយល់ពីតួនាទីរបស់មជ្ឈមណ្ឌលក្នុងការអភិរក្ស និងលើកកម្ពស់សិប្បកម្មខ្មែរ តាមរយៈការបណ្តុះបណ្តាល និងផ្ទេរជំនាញពីសិប្បករដែលមានបទពិសោធន៍ទៅកាន់យុវជន និងអ្នកចាប់អាជីពថ្មីៗ។ សិប្បកម្មសំខាន់ៗរួមមាន ចម្លាក់ឈើ ថ្ម និងស្បែក តម្បាញសូត្រ និងកប្បាស ផលិតផលពីផ្តៅ និងកំប្លោក គំនូរ និងការសូនរូប ព្រមទាំងសិប្បកម្មប្រពៃណីផ្សេងៗទៀត ដែលឆ្លុះបញ្ចាំងពីភាពប៉ិនប្រសប់ និងអត្តសញ្ញាណវប្បធម៌ខ្មែរ។

មជ្ឈមណ្ឌលក៏បានផ្សារភ្ជាប់បច្ចេកទេសផលិតតាមបែបប្រពៃណីជាមួយការរចនាបែបទំនើប ដោយប្រើប្រាស់វត្ថុធាតុដើមក្នុងស្រុក និងកែច្នៃធនធានធម្មជាតិឱ្យក្លាយជាផលិតផលមានតម្លៃបន្ថែម។ ជាមួយគ្នានេះ មជ្ឈមណ្ឌលក៏ជំរុញការតាំងបង្ហាញ និងផ្សព្វផ្សាយផលិតផល ដើម្បីពង្រីកទីផ្សារក្នុងស្រុក និងអន្តរជាតិ បង្កើតឱកាសការងារ និងលើកកម្ពស់ជីវភាពសហគមន៍។

បន្ទាប់មក គណៈប្រតិភូបានបន្តទស្សនកិច្ចនៅក្រុមហ៊ុន Holly Creek Whisky Co., Ltd. ដែលជាសហគ្រាសផលិតស្រាវីស្គីក្នុងស្រុក មានទីតាំងនៅខេត្តសៀមរាប និងបានចាប់ផ្តើមអភិវឌ្ឍសកម្មភាពផលិតកម្មតាំងពីឆ្នាំ២០១៦។ ក្នុងឱកាសនោះ គណៈប្រតិភូបានស្វែងយល់ពីដំណើរការផលិត ចាប់ពីការជ្រើសរើសវត្ថុធាតុដើម ការចម្រាញ់ រហូតដល់ការរក្សាទុកក្នុងធុងឈើអុក ដើម្បីអភិវឌ្ឍគុណភាព និងរសជាតិផលិតផល។ វត្ថុធាតុដើមដែលប្រើប្រាស់រួមមាន ពោត ស្រូវសាលី និងវត្ថុធាតុដើមមួយចំនួនពីប្រភពក្នុងស្រុក និងនាំចូលពីបរទេស។

ចំណុចគួរឱ្យកត់សម្គាល់ គឺក្រុមហ៊ុនបានប្រើប្រាស់វត្ថុធាតុដើមក្នុងស្រុកមួយចំនួន ដូចជា ស្រូវរំដួល និងពោតពីខេត្តបាត់ដំបង។ លើសពីនេះ ក្រុមហ៊ុនក៏បានយកកាកសំណល់ពីដំណើរការផលិតទៅប្រើប្រាស់ជាចំណីសត្វ និងកែច្នៃទឹកសំណល់ឱ្យទៅជាជីសរីរាង្គផងដែរ។ ការអនុវត្តនេះបង្ហាញពីការប្រើប្រាស់ធនធានប្រកបដោយប្រសិទ្ធភាព និងការខិតខំបង្កើតផលិតផលមានតម្លៃបន្ថែម ព្រមទាំងមានអត្តសញ្ញាណផ្ទាល់ខ្លួន។

វិស័យសិប្បកម្ម និងឧស្សាហកម្មផលិតក្នុងស្រុក មានតួនាទីសំខាន់ក្នុងការជំរុញកំណើនសេដ្ឋកិច្ច បង្កើតការងារ និងប្រាក់ចំណូល ព្រមទាំងបង្កើតឱកាសអាជីវកម្មដល់សហគមន៍។ ការអភិវឌ្ឍជំនាញ ការលើកកម្ពស់គុណភាពផលិតផល ការប្រើប្រាស់វត្ថុធាតុដើមក្នុងស្រុក និងការពង្រឹងសមត្ថភាពសហគ្រាស គឺជាកត្តាចាំបាច់ក្នុងការបង្កើនតម្លៃបន្ថែម និងពង្រឹងភាពប្រកួតប្រជែងរបស់ផលិតផលខ្មែរនៅលើទីផ្សារជាតិ និងអន្តរជាតិ។

ក្នុងនាមជាស្ថាប័នតំណាងឱ្យវិស័យឯកជន សភាពាណិជ្ជកម្មកម្ពុជាតែងតែយកចិត្តទុកដាក់លើការពង្រឹងទំនាក់ទំនងរវាងពាណិជ្ជករ សហគ្រាស និងស្ថាប័នពាក់ព័ន្ធ ដើម្បីចែករំលែកបទពិសោធន៍ ស្វែងរកឱកាសសហការ និងជំរុញការអភិវឌ្ឍធុរកិច្ចក្នុងស្រុកឱ្យកាន់តែរីកចម្រើន និងមានភាពប្រកួតប្រជែង។

សូមបញ្ជាក់ថា កម្មវិធីទស្សនកិច្ចពាណិជ្ជកម្មនេះ រៀបចំឡើងដោយសភាពាណិជ្ជកម្មកម្ពុជា និងសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ ដោយសហការជាមួយមជ្ឈមណ្ឌលអភិវឌ្ឍធុរកិច្ច និងមូលនិធិអភិវឌ្ឍន៍ជំនាញ ព្រមទាំងទទួលបានការគាំទ្រពីសហគ្រិនខ្មែរ និងការឧបត្ថម្ភពីធនាគារអភិវឌ្ឍន៍ជនបទ និងកសិកម្ម ធនាគារវីង (ខេមបូឌា) ម.ក. ធនាគារប្រៃសណីយ៍កម្ពុជា ក.អ. និងកំពង់ផែស្វយ័តភ្នំពេញ៕

ព័ត៌មានគួរចាប់អារម្មណ៍

គណៈរដ្ឋមន្ត្រីប្រជុំពិនិត្យរបាយការណ៍វឌ្ឍនភាពនៃការអនុវត្តវិធានការគន្លឹះក្នុងការពង្រឹងសមត្ថភាពរដ្ឋបាលសាធារណៈ ដើម្បីជំរុញនិងលើកកម្ពស់ការអនុវត្តការងារកែទម្រង់រដ្ឋបាលសាធារណៈ ឱ្យមានប្រសិទ្ធភាពខ្ពស់ ()

ព័ត៌មានគួរចាប់អារម្មណ៍

សម្ដេចតេជោ ហ៊ុន សែន ជំរុញឲ្យកម្ពុជា-វៀតណាម សហការគ្នាធានាសន្ដិសុខតាមព្រំដែន រួមគ្នាប្រយុទ្ធនឹងព័ត៌មានក្លែងក្លាយ ពិសេសចៀសវាងកុំឲ្យមានការប្រើប្រាស់កម្លាំងក្នុងប្រទេសណាមួយប្រឆាំងនឹងប្រទេសមួយទៀត រវាងកម្ពុជា-ឡាវ-វៀតណាម ()

ព័ត៌មានគួរចាប់អារម្មណ៍

សម្តេចតេជោ ហ៊ុន សែន សម្តែងការទទួលខុសត្រូវ និងសូមអភ័យទោសប្រជាពលរដ្ឋទូទាំងប្រទេស ដោយសារជឿទុកចិត្តប្រទេសថៃពេក និងមិនបានត្រៀមខ្លួនគ្រប់គ្រាន់ សម្រាប់ការប្រយុទ្ធ ()

ព័ត៌មានគួរចាប់អារម្មណ៍

សម្តេចធិបតី ហ៊ុន ម៉ាណែត អញ្ជើញបំពេញទស្សនកិច្ចផ្លូវការ នៅសាធារណរដ្ឋសង្គមនិយមវៀតណាម ()

ព័ត៌មានគួរចាប់អារម្មណ៍

អភិបាលខេត្តប៉ៃលិន អញ្ជើញបួងសួងសុំសេចក្តីសុខចម្រើនក្នុងឱកាសលើករូបសំណាកព្រះវិស្ណុធ្វើពីថ្មភ្នំដាក់លើរង្វង់មូលថ្មី ដើម្បីលើកកម្ពស់សោភណភាព និងសុវត្ថិភាព ក្នុងការធ្វើដំណើររបស់ប្រជាពលរដ្ឋ ()

វីដែអូ