ភ្នំពេញ៖ ស្ថានទូតសាធារណរដ្ឋកូរ៉េប្រចាំកម្ពុជា បានរៀបចំពិធីអបអរសាទរ ទិវាជាតិ និងទិវាកងទ័ពកូរ៉េ ឆ្នាំ២០២៦ នៅថ្ងៃទី១ ខែតុលា ឆ្នាំ២០២៦ ដោយមានអ្នកចូលរួមប្រមាណ ៤០០នាក់ ក្នុងនោះ មានមន្ត្រីជាន់ខ្ពស់រាជរដ្ឋាភិបាល និងសមាជិកសភាកម្ពុជា សមាជិកសហគមន៍ការទូត សហគមន៍កូរ៉េ និងតំណាងពីវិស័យនានា ព្រមទាំងមានការអញ្ជើញចូលរួមជាភ្ញៀវកិត្តិយសពីលោកបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា។ក្នុងសុន្ទរកថាស្វាគមន៍ លោក គីម ចាងយ៉ុង (Kim Chang Yong) ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា បានលើកឡើងថា កូរ៉េ និងកម្ពុជា មានបទពិសោធន៍ស្រដៀងគ្នាក្នុងការឆ្លងកាត់ដំណាក់កាលលំបាកក្នុងប្រវត្តិសាស្ត្ររបស់ខ្លួន និងបានខិតខំធ្វើការរួមគ្នាឆ្ពោះទៅរកអនាគតកាន់តែប្រសើរ។ លោកបានវាយតម្លៃថា ទំនាក់ទំនងទ្វេភាគីបានរីកចម្រើនជាបន្តបន្ទាប់ ចាប់តាំងពីការបង្កើតទំនាក់ទំនងការទូតឡើងវិញក្នុងឆ្នាំ១៩៩៧។លោកឯកអគ្គរដ្ឋទូតបានចាត់ទុកការលើកកម្ពស់ទំនាក់ទំនងកម្ពុជា-កូរ៉េ ទៅជា ភាពជាដៃគូយុទ្ធសាស្ត្រ ក្នុងឆ្នាំ២០២៤ ថាជាសមិទ្ធផលដ៏សំខាន់មួយ ហើយបានបង្ហាញក្តីសង្ឃឹមថា ទំនាក់ទំនងរវាងប្រទេសទាំងពីរនឹងបន្តរីកចម្រើនលើវិស័យជាច្រើន រួមមាន កិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន កិច្ចសហប្រតិបត្តិការសេដ្ឋកិច្ច និងពាណិជ្ជកម្ម កិច្ចសហប្រតិបត្តិការអភិវឌ្ឍន៍ ការអប់រំ និងវប្បធម៌ ព្រមទាំងការផ្លាស់ប្តូររវាងប្រជាជននិងប្រជាជន។ជាមួយគ្នានេះ លោកបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអបអរសាទរចំពោះការអភិវឌ្ឍសេដ្ឋកិច្ច សង្គម និងសមិទ្ធផលរបស់សាធារណរដ្ឋកូរ៉េនៅលើឆាកអន្តរជាតិ។ លោកបានបង្ហាញការរំពឹងថា ទំនាក់ទំនងកម្ពុជា-កូរ៉េនឹងបន្តអភិវឌ្ឍកាន់តែស៊ីជម្រៅ ក្នុងឱកាសខួបលើកទី៣០ នៃការបង្កើតទំនាក់ទំនងការទូតឡើងវិញនៅឆ្នាំ២០២៧។លោកបណ្ឌិតសភាចារ្យ ហង់ ជួនណារ៉ុន ក៏បានបង្ហាញក្តីសង្ឃឹមថា ប្រទេសទាំងពីរ ក្នុងនាមជាភាគីនៃកិច្ចព្រមព្រៀងពាណិជ្ជកម្មសេរីទ្វេភាគី កិច្ចព្រមព្រៀងពាណិជ្ជកម្មសេរីកូរ៉េ-អាស៊ាន និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) នឹងបន្តពង្រីកកិច្ចសហប្រតិបត្តិការលើវិស័យវិនិយោគ សកម្មភាពធុរកិច្ច និងការអភិវឌ្ឍ។ក្នុងពិធីនេះ ភ្ញៀវកិត្តិយស និងអ្នកចូលរួមក៏បានទទួលទានម្ហូបអាហារកូរ៉េជាច្រើនមុខ ដូចជា គីមបាប់ និងប៊ុលហ្គូហ្គី ព្រមទាំងបានចូលរួមអបអរសាទរទិវាបុណ្យជាតិនៃសាធារណរដ្ឋកូរ៉េ និងផ្លាស់ប្តូរយោបល់អំពីការពង្រឹងមិត្តភាព និងកិច្ចសហប្រតិបត្តិការរវាងកម្ពុជា និងកូរ៉េបន្ថែមទៀត។ស្ថានទូតសាធារណរដ្ឋកូរ៉េប្រចាំកម្ពុជា នឹងយកឱកាសខួបលើកទី៣០ នៃការបង្កើតទំនាក់ទំនងការទូតឡើងវិញនៅឆ្នាំ២០២៧ ដើម្បីបន្តពង្រឹងទំនុកចិត្ត និងកិច្ចសហប្រតិបត្តិការដែលប្រទេសទាំងពីរបានកសាងក្នុងរយៈពេល៣ទសវត្សរ៍កន្លងមក ពង្រឹងទំនាក់ទំនងទ្វេភាគី និងបន្តពង្រីកការផ្លាស់ប្តូរ និងកិច្ចសហប្រតិបត្តិការលើវិស័យចម្រុះ៕
ព័ត៌មានគួរចាប់អារម្មណ៍
គណៈរដ្ឋមន្ត្រីប្រជុំពិនិត្យរបាយការណ៍វឌ្ឍនភាពនៃការអនុវត្តវិធានការគន្លឹះក្នុងការពង្រឹងសមត្ថភាពរដ្ឋបាលសាធារណៈ ដើម្បីជំរុញនិងលើកកម្ពស់ការអនុវត្តការងារកែទម្រង់រដ្ឋបាលសាធារណៈ ឱ្យមានប្រសិទ្ធភាពខ្ពស់ ()
សម្ដេចតេជោ ហ៊ុន សែន ជំរុញឲ្យកម្ពុជា-វៀតណាម សហការគ្នាធានាសន្ដិសុខតាមព្រំដែន រួមគ្នាប្រយុទ្ធនឹងព័ត៌មានក្លែងក្លាយ ពិសេសចៀសវាងកុំឲ្យមានការប្រើប្រាស់កម្លាំងក្នុងប្រទេសណាមួយប្រឆាំងនឹងប្រទេសមួយទៀត រវាងកម្ពុជា-ឡាវ-វៀតណាម ()
សម្តេចតេជោ ហ៊ុន សែន សម្តែងការទទួលខុសត្រូវ និងសូមអភ័យទោសប្រជាពលរដ្ឋទូទាំងប្រទេស ដោយសារជឿទុកចិត្តប្រទេសថៃពេក និងមិនបានត្រៀមខ្លួនគ្រប់គ្រាន់ សម្រាប់ការប្រយុទ្ធ ()
សម្តេចធិបតី ហ៊ុន ម៉ាណែត អញ្ជើញបំពេញទស្សនកិច្ចផ្លូវការ នៅសាធារណរដ្ឋសង្គមនិយមវៀតណាម ()
អភិបាលខេត្តប៉ៃលិន អញ្ជើញបួងសួងសុំសេចក្តីសុខចម្រើនក្នុងឱកាសលើករូបសំណាកព្រះវិស្ណុធ្វើពីថ្មភ្នំដាក់លើរង្វង់មូលថ្មី ដើម្បីលើកកម្ពស់សោភណភាព និងសុវត្ថិភាព ក្នុងការធ្វើដំណើររបស់ប្រជាពលរដ្ឋ ()
វីដែអូ