បាត់ដំបង៖ នៅព្រឹកថ្ងៃទី១៧ ខែកញ្ញា ឆ្នាំ២០២៥ ក្រសួងព័ត៌មាន បានរៀបចំវគ្គបំពាក់បំប៉ន ស្តីពី«ការពង្រឹងសមត្ថភាព លើការងារព័ត៌មាននិងសាធារណមតិ»ដែលធ្វើឡើងនៅសាលប្រជុំសាលាខេត្តបាត់ដំបង ក្រោមអធិបតីភាពឯកឧត្តមបណ្ឌិត ឆាយ សុផល រដ្ឋលេខាធិការក្រសួងព័ត៌មាន, លោក ផេង សិទ្ធី អភិបាលរងខេត្តបាត់ដំបង, ឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មាននិងឯកឧត្តម គ្រី ចំរើន តំណាងឯកឧត្តម ឃួន វិចិត្រ អនុរដ្ឋលេខាធិការក្រសួងព័ត៌មាន ដោយមានការចូលរួមពីលោក លោកស្រីប្រធាន អនុប្រធានមន្ទីរព័ត៌មានព្រមទាំងសិក្ខាកាមជាមន្រ្តីមកពីមន្ទីរព័ត៌មានខេត្តចំនួន៦ រួមមានខេត្តបាត់ដំបង បន្ទាយមានជ័យ ប៉ៃលិន ពោធិ៍សាត់ កំពង់ឆ្នាំង និងខេត្តឧត្តរមានជ័យ។

ក្នុងនាមមន្ទីរព័ត៌មានខេត្តបាត់ដំបងដែលជាម្ចាស់ផ្ទះរៀបចំវគ្គបំប៉ននេះ លោក សុវណ្ណ វិទិត្យា ប្រធានមន្ទីរព័ត៌មានខេត្តបាត់ដំបង បានបង្ហាញសេចក្តីសោមនស្សរីករាយក្រៃលែង និងសូមគោរពថ្លែងអំណរគុណដល់ ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន និងឯកឧត្តម លោកជំទាវ លោក លោកស្រី ជាគ្រូបង្គោល ដែលបានរៀបចំឱ្យមានវគ្គបំពាក់បំប៉នដ៏មានសារៈសំខាន់នេះឡើង។វគ្គបំពាក់បំប៉ននេះពិតជាមានសារប្រយោជន៍ចំពោះមន្ត្រីរាជការនៃមន្ទីរព័ត៌មានខេត្តបាត់ដំបង ក៏ដូចជាខេត្តនានា ដើម្បីអនុវត្តការងារព័ត៌មាន និងសាធារណមតិ កាន់តែល្អប្រសើរបន្ថែមទៀត។

លោក សុវណ្ណ វិទិត្យា បានសម្ដែងក្ដីសង្ឃឹមយ៉ាងមុតមាំថា បន្ទាប់ពីបញ្ចប់វគ្គបណ្តុះបណ្តាលនេះ មន្រ្តីទាំងអស់នឹងបន្តទំនាក់ទំនងគ្នាទៅវិញទៅមក ផ្លាស់ប្តូរនូវព័ត៌មាន បញ្ហាប្រឈមនានា សំដៅលើកស្ទួយនូវកិច្ចការងារជារួមលើវិស័យព័ត៌មាន និងសូមគោរពថ្លែងអំណរគុណយ៉ាងជ្រាលជ្រៅចំពោះ ឯកឧត្តម លោកជំទាវលោកលោកស្រីនិងសិក្ខាកាមទាំងអស់ដែលបានចំណាយពេលវេលាដ៏មានតម្លៃដែលបានអញ្ជើញចូលរួមវគ្គបំពាក់បំប៉នស្តីពី«ការពង្រឹងសមត្ថភាពលើការងារព័ត៌មាន និងសាធារណមតិ»។

លោក សុវណ្ណ វិទិត្យា គូសបញ្ជាក់ថា ក្រុមការងារព័ត៌មាន និងសាធារណមតិនៃមន្ទីរព័ត៌មានខេត្តបាត់ដំបងបានធ្វើការងារយ៉ាងសកម្ម តាមការណែនាំរបស់ថ្នាក់ដឹកនាំ បង្កើនការផលិតព័ត៌មានតាមវិស័យនានាបានសរុបចំនួន១៤៧២ អត្ថបទព័ត៌មាន ក្នុងរយៈពេល៨ខែ គិតចាប់ពីខែមករា ដល់ ខែសីហា ឆ្នាំ២០២៥។

លោក ផេង សិទ្ធី អភិបាលរងខេត្តបាត់ដំបង ថ្លែងឱ្យដឹងថា ការងារគ្រប់គ្រង និងផ្សព្វផ្សាយលើវិស័យព័ត៌មាន និងសោតទស្សន៍ក្នុងខេត្តបាត់ដំបងមានការរីកចម្រើនគួរឱ្យកត់សម្គាល់។ ក៏ប៉ុន្តែក្នុងនេះ ក៏មានបញ្ហាមួយចំនួនក្នុងខេត្ត ក៏ដូចជាព័ត៌មានទូទៅ ជាអាទិ៍៖ ព័ត៌មានក្លែងក្លាយ ព័ត៌មានប្រឌិត អ្នកផលិតមាតិកា (Content Creator), MMO, Influencer និងព័ត៌មានអសកម្មមួយចំនួន ដែលរដ្ឋបាលខេត្តត្រូវបានយកចិត្តទុកដាក់ និងបានរៀបចំបង្កើតឱ្យរចនាសម្ព័ន្ធគ្រប់គ្រងនៅតាមមន្ទីរអង្គភាពជំនាញក្នុងខេត្ត តាមបណ្តារដ្ឋបាលក្រុងស្រុក និងដល់រដ្ឋបាលឃុំសង្កាត់ មានយន្តការសម្រាប់តាមដាន សាធារណមតិក្នុងបណ្តាញសង្គមនានា ដើម្បីឆ្លើយបំភ្លឺ និងបកស្រាយបានទាន់ពេលវេលាតាមរយៈ Messenger Telegram ជាដើម។

លោក ផេង សិទ្ធី ថ្លែងបន្ថែមថា ក្រុមការងារប្រតិកម្មរហ័សរបស់រដ្ឋបាលខេត្ត មិនត្រឹមតែតាមដានសាធារណមតិក្នុងគេហទំព័ររបស់ខេត្តទេ ក៏មានបែងចែកក្រុមតាមដានសាធារណមតិក្នុង Page របស់ថ្នាក់ដឹកនាំសំខាន់ៗ មាន Pageរបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា Pageរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា Pageរបស់សម្តេចក្រឡាហោម ស ខេង ឧត្តមក្រុមប្រឹក្សាផ្ទាល់ព្រះមហាក្សត្រ Pageរបស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងPageរបស់ក្រសួងមហាផ្ទៃ ជាដើម ដើម្បីបានឆ្លើយបំភ្លឺ និងបកស្រាយទាន់ពេលវេលា។

ជាមួយគ្នានេះ លោក ផេង សិទ្ធី ថ្លែងនូវការកោតសរសើរចំពោះថ្នាក់ដឹកនាំ និងមន្ដ្រីរាជការក្រោមឱវាទនៃមន្ទីរព័ត៌មានខេត្តបាត់ដំបងដែលកន្លងមកបានរួបរួមសាមគ្គីគ្នាខិតខំបំពេញការងារអស់សមត្ថភាពតាមជំនាញនីមួយៗ ក្នុងព្រឹត្តការណ៍ធំៗនានា ព្រមទាំងបានបំពេញការងារជូនអង្គភាព រហូតសម្រេចបានលទ្ធផលគាប់ប្រសើរ ទោះបីនៅមានបញ្ហាប្រឈមមួយចំនួន ដែលនៅសេសសល់ក៏ដោយ ក៏យើងនឹងរួមគ្នាដោះស្រាយបញ្ហាប្រឈមទាំងអស់នោះ ដើម្បីគ្រប់គ្រងវិស័យព័ត៌មាន និងសោទស្សន៍ក្នុងខេត្ត ទប់ស្កាត់រាល់ព័ត៌មានក្លែងក្លាយ ព័ត៌មានប្រឌិត និងបន្សាបព័ត៌មានផ្សេងៗឱ្យបានទាន់ពេលវេលា និងមានប្រសិទ្ធភាព ស្របទៅតាមគោលនយោបាយ និងយុទ្ធសាស្ត្រថ្មីរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។

ឯកឧត្តមបណ្ឌិត ឆាយ សុផល រដ្ឋលេខាធិការក្រសួងព័ត៌មាន ថ្លែងឱ្យដឹងថា បច្ចុប្បន្ននេះ ប្រទេសកម្ពុជា ក៏ដូចជាសកលលោកកំពុងប្រឈមមុខជាមួយព័ត៌មានក្លែងក្លាយនិងកំពុងប្រយុទ្ធប្រឆាំងយ៉ាងសកម្មជាមួយនឹងព័ត៌មានក្លែងក្លាយ។

ឯកឧត្តមបណ្ឌិត ថ្លែងបន្ថែមថា ក្រសួងព័ត៌មានមានតួនាទី២ធំៗគឺទី១.ក្រសួងព័ត៌មានកំពុងធ្វើខ្លួនឱ្យទទៅជាស្ថាប័នទំនាក់ទំនងសាធារណៈរបស់រាជរដ្ឋាភិបាល ទី២.

ក្រសួងព័ត៌មានរួមជាមួយក្រសួងចំនួន៦ផ្សេងទៀតដើរតួនាទីជាក្រសួងគាំទ្រក្នុងការងារព័ត៌មាន និងសោតទស្សន៍ តាមរយៈការជួយផ្សព្វផ្សាយ និងបណ្ដុះបណ្ដាលឱ្យស្ថាប័នដទៃទៀត។

ឯកឧត្តមបណ្ឌិត ឆាយ សុផល បានថ្លែងថា ការងារព័ត៌មាន និងសាធារណមតិ គឺជាការងារសំខាន់ ដែលរាជរដ្ឋាភិបាល ក៏ដូចជាក្រសួងព័ត៌មានកំពុងយកចិត្តទុកដាក់ខ្ពស់។ ដោយក្រសួងព័ត៌មានបានដាក់ចេញនូវចក្ខុវិស័យ ធ្វើយ៉ាងណាប្រែក្លាយក្រសួងព័ត៌មានឱ្យទៅជាស្ថាប័នទំនាក់ទំនងសាធារណៈរបស់រាជរដ្ឋាភិបាល ប្រកបដោយបុរេសកម្ម សកម្ម អន្តរសកម្ម ប្រសិទ្ធភាព និងប្រសិទ្ធផល ផ្អែកលើអភិក្រម «ថ្មី ពិត លឿន និងទូលំទូលាយ» ប្រកបដោយជំនឿទុកចិត្ត និងវិជ្ជាជីវៈ។

ឯកឧត្តមបណ្ឌិត ឆាយ សុផល បានពន្យល់ថា បុរេសកម្មគឺការធ្វើទុកមុន សកម្មគឺធ្វើដោយយកចិត្តទុកដាក់ខ្ពស់ អន្តរសកម្មគឺការធ្វើការសហការជាមួយមន្ទីរជំនាញពាក់ព័ន្ធ ចំណែកឯប្រសិទ្ធភាព គឺអ្វីដែលយើងអាចសម្រេចបានតាមផែនការដែលបានដាក់ចេញ និងប្រសិទ្ធផល គឺផលសម្រេចបានមានលក្ខណៈយូរអង្វែង។

ឯកឧត្តមបានបញ្ជាក់ថា មន្ទីរព័ត៌មានរាជធានី-ខេត្ត គឺជាអ្នកសម្របសម្រួល ជាអ្នកគាំទ្រ និងជាអ្នកនាំពាក្យក្នុងខេត្ត គឺជាអ្នកពាំនាំព័ត៌មាន សំណូមពរពីមហាជនសម្រាប់ខេត្តបានដឹង និងផ្សព្វផ្សាយព័ត៌មានពីសមិទ្ធផល និងដំណោះស្រាយរបស់ខេត្តជូនដល់ប្រជាពលរដ្ឋតាមបណ្តាសហគមន៍មូលដ្ឋានបានដឹងផងដែរ៕