ភ្នំពេញ៖ នាព្រឹកថ្ងៃទី១០ ខែកញ្ញា ឆ្នាំ២០២៥ ឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន បានដឹកនាំកិច្ចប្រជុំបូកសរុបផលប៉ះពាល់ដោយសារជម្លោះប្រដាប់អាវុធកម្ពុជា-ថៃ និងការរៀបចំផែនការសកម្មភាពសម្រាប់ធ្វើការបោសសម្អាតយុទ្ធភណ្ឌគ្រឿងផ្ទុះ ក្នុងភូមិសាស្រ្តខេត្តឧត្តរមានជ័យ។ កិច្ចប្រជុំនេះ មានការចូលរួមពី លោកស្រី មិន ធារី អភិបាលរងខេត្តឧត្តរមានជ័យ តំណាងឯកឧត្តម មាន ចាន់យ៉ាដា អភិបាលខេត្តឧត្តរមានជ័យ អភិបាលស្រុក/ក្រុង ប្រធានមន្ទីរពាក់ព័ន្ធ កងកម្លាំងប្រដាប់អាវុធ ក្រុមការងាររៀបចំផែនការសកម្មភាពមីនខេត្ត និងប្រតិបត្តិករដោះមីន។ក្នុងជម្លោះប្រដាប់កន្លងទៅនេះ ខេត្តឧត្តរមានជ័យ បានទទួលការខូចខាត និងរងការបំផ្លិចបំផ្លាញនូវហេដ្ឋារចនាសម្ព័ន្ធស៊ីវិលជាច្រើន ក្នុងនោះរួមមាន ផ្ទះប្រជាពលរដ្ឋ សាលារៀន មណ្ឌលសុខភាព ទីសក្ការៈបូជា និងវត្តអារាម ដោយសារការទម្លាក់គ្រាប់បែក និងគ្រាប់ផ្លោងរបស់ថៃ ហើយប្រជាពលរដ្ឋរាប់ម៉ឺនគ្រួសារ ត្រូវបានជម្លៀសទៅទីតាំងសុវត្ថិភាព។ ផលប៉ះពាល់ទាំងដោយយុទ្ធភណ្ឌគ្រឿងផ្ទុះនោះ តម្រូវឱ្យមានការសិក្សាវាយតម្លៃឱ្យបានគ្រប់ជ្រុងជ្រោយ និងធ្វើការបោសសម្អាតជាមុន មុននឹងការវិលត្រឡប់របស់ប្រជាពលរដ្ឋភៀសសឹកសម្រាប់បំពេញសកម្មភាពប្រចាំថ្ងៃ។ក្នុងកិច្ចប្រជុំនោះ ឯកឧត្តមបណ្ឌិត លី ធុជ បានលើកឡើងថា ខេត្តឧត្តរមានជ័យ ធ្លាប់ទទួលរងផលប៉ះពាល់រួចមកហើយដោយសារសង្រ្គាមរ៉ាំរ៉ៃនៅកម្ពុជា និងបានបន្សល់ទុកនូវមរតកសង្រ្គាមយ៉ាងច្រើនសន្ធឹកសន្ធាប់ គឺគ្រាប់មីន និងសំណល់ជាតិផ្ទុះពីសង្រ្គាម។ រយៈពេលជាង ៣០ឆ្នាំមកនេះ រាជរដ្ឋាភិបាល រួមជាមួយប្រទេសជាមិត្ត ដៃគូអភិវឌ្ឍន៍ ប្រតិបត្តិការដោះមីន និងភាគីពាក់ព័ន្ធដទៃទៀត បានរួមសហការគ្នាធ្វើការបោសសម្អាតមីននិងសំណល់ជាតិផ្ទុះពីសង្រ្គាមបានចំនួន ២៩៦គីឡូម៉ែត្រការ៉េ ដោយរកឃើញ និងកម្ទេចចោលមីនប្រឆាំងមនុស្សចំនួន ១០៦.៧១២គ្រាប់ មីនប្រឆាំងរថក្រោះចំនួន ១៧៨៥គ្រាប់ និងសំណល់ជាតិផ្ទុះពីសង្រ្គាមដទៃទៀត ចំនួន ១០០.៥៥៨គ្រាប់។ឯកឧត្តមទេសរដ្ឋមន្រ្តី បានបន្តទៀត ទន្ទឹមនឹងកិច្ចខិតខំប្រឹងប្រែងនេះ ក្នុងអំឡុងពេលជម្លោះប្រដាប់អាវុធកម្ពុជា-ថៃរយៈពេល ០៥ថ្ងៃថ្មីៗ យោធាថៃ បានបន្សល់នូវយុទ្ធភណ្ឌគ្រឿងផ្ទុះយ៉ាងច្រើនបន្ថែមទៀត ព្រមទាំងបន្ថែមនូវបន្ទុកជាទម្ងន់ដល់រាជរដ្ឋាភិបាលកម្ពុជា ក៏ដូចជារដ្ឋបាលខេត្តឧត្តរមានជ័យ ដើម្បីធ្វើការដោះស្រាយយុទ្ធភណ្ឌគ្រឿងផ្ទុះទាំងនោះ ព្រមទាំងបង្កឱ្យមានការខូចខាតដល់សំណង់សាធារណៈ និងផ្ទះសម្បែងរបស់ប្រជាពលរដ្ឋ។ ក្នុងឱកាសនោះ ឯកឧត្តម លី ធុជ បានសម្តែងនូវការសោកស្តាយចំពោះការខូចខាត និងការបំផ្លិចបំផ្លាញដោយយុទ្ធភណ្ឌគ្រឿងផ្ទុះរបស់យោធាថៃ ដែលឯកឧត្តមចាត់ទុកទង្វើរបស់យោធាថៃ បានប៉ះពាល់យ៉ាងធ្ងន់ធ្ងរដល់សុខសន្តិភាពរបស់កម្ពុជាដែលបានមកយ៉ាងលំបាក និងភាពសុខដុមរបស់ប្រជាជនកម្ពុជា។ ឯកឧត្តមទេសរដ្ឋមន្រ្តី លី ធុជ បានបញ្ជាក់ថា ដើម្បីឆ្លើយតបនឹងតម្រូវការចាំបាច់ចំពោះមុខរបស់រដ្ឋបាលខេត្តឧត្តរមានជ័យ និងដើម្បីធានាសុខសុវត្ថិភាពដល់ប្រជាពលរដ្ឋសម្រាប់ការបំពេញសកម្មភាពប្រចាំថ្ងៃវិញ អាជ្ញាធរមីន រួមសហការជាមួយរដ្ឋបាលខេត្ត និងភាគីពាក់ព័ន្ធ បានចុះពិនិត្យវាយតម្លៃដោយផ្ទាល់នូវផលប៉ះពាល់ដោយយុទ្ធភណ្ឌគ្រឿងផ្ទុះទាំងនោះ ព្រមទាំងបានចាត់ជាផែនការអាទិភាពក្នុងការបោសសម្អាតឱ្យបានគ្រប់ជ្រុងជ្រោយ ក៏ដូចជាគាំទ្រដល់ការកសាងនិងការស្តារឡើងវិញដល់សហគមន៍មូលដ្ឋាន ដើម្បីផ្តល់នូវក្តីសង្ឃឹម និងភាពថ្លៃថ្នូរជូនប្រជាពលរដ្ឋ។ ឯកឧត្តមទេសរដ្ឋមន្រ្តី បានបន្តទៀតថា អាជ្ញាធរមីន ត្រៀមខ្លួនជានិច្ចក្នុងការដឹកនាំ សម្របសម្រួល និងសហការជាមួយប្រតិបត្តិករជាតិស៊ីម៉ាក់ ធ្វើការបោសសម្អាតយុទ្ធភណ្ឌគ្រឿងផ្ទុះនៅតំបន់ដែលទទួលរងផលប៉ះពាល់ទាំងនោះ ស្របតាមការចាំបាច់ និងកាលៈទេសៈជាក់ស្តែង។ ជាមួយគ្នានោះ ឯកឧត្តមទេសរដ្ឋមន្រ្តី បានស្នើសុំឱ្យរដ្ឋបាលខេត្ត និងមន្ទីរអង្គភាពពាក់ព័ន្ធ ធ្វើការរាយការណ៍នូវតម្រូវការជាក់ស្តែងរបស់ខ្លួននៅតាមតំបន់ដែលរងផលប៉ះពាល់ដោយសារយុទ្ធភណ្ឌគ្រឿងទាំងនោះ និងផ្តល់កិច្ចសហការដើម្បីសិក្សាវាយតម្លៃ និងធ្វើការបោសសម្អាតជាមុន។ជាចុងបញ្ចប់ ឯកឧត្តមបណ្ឌិត លី ធុជ បានកោតសរសើរប្រកបដោយការវាយតម្លៃខ្ពស់ចំពោះស្មារតីលះបង់ទាំងយប់ទាំងថ្ងៃ ការទទួលខុសត្រូវ និងកិច្ចខិតខំប្រឹងប្រែងរបស់រដ្ឋបាលខេត្តឧត្តរមានជ័យ ក្នុងការដោះស្រាយ និងរៀបចំទីជម្រកបណ្តោះអាសន្ន ការផ្ដល់ជំនួយ ការការពារសន្តិសុខ ការថែទាំសុខភាព និងការគាំទ្រផ្លូវចិត្តដល់ជនភៀសសឹក ដើម្បីធានាបាននូវភាពសុខសាន្តជូនពួកគាត់ ស្របតាមគោលដៅរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ៕
ព័ត៌មានគួរចាប់អារម្មណ៍
ឯកឧត្តមរដ្ឋមន្រ្តី សុខ សូកេន ដឹកនាំកិច្ចប្រជុំប្រចាំសប្ដាហ៍ ដើម្បីត្រួតពិនិត្យ និងតាមដានវឌ្ឍនភាពការងារអនុក្រុមការងារទាំងបី និងលេខាធិការដ្ឋានរបស់ក្រុមការងារតាមដាន និងត្រួតពិនិត្យការអនុវត្តយុទ្ធសាស្រ្ត «ព៤ជ៤» របស់ក្រសួងអធិការកិច្ច ()
សម្តេចមហាបវរធិបតី ហ៊ុន ម៉ាណែត ដឹកនាំគណៈប្រតិភូអញ្ជើញចូលរួមកិច្ចប្រជុំកំពូលអង្គការកិច្ចសហប្រតិបត្តិការសៀងហៃបូក នៅទីក្រុងធានជីន ប្រទេសចិន ()
ឧបនាយករដ្ឋមន្ត្រី កើត រិទ្ធ ដឹកនាំកិច្ចប្រជុំលើកទី៤ នៃក្រុមប្រឹក្សាភិបាលបណ្ឌិត្យសភាភូមិន្ទយុត្តិធម៌កម្ពុជា ដើម្បីពិនិត្យ និងពិភាក្សាលើលទ្ធផលនៃកិច្ចដំណើរការរបស់ ប.ភ.យ.ក. និងលក្ខណវិនិច្ឆ័យនិងលក្ខណសម្បត្តិសម្រាប់ជ្រើសរើសគ្រូបង្រៀននៃ ប.ភ.យ.ក. និងអនុម័តលើបញ្ជីឈ្មោះបេក្ខជន វិញ្ញាសា និងកាលបរិច្ឆេទនៃការប្រឡងប្រជែងជ្រើសរើសសិស្សវិជ្ជាជីវៈតុលាការ និងវិជ្ជាជីវៈច្បាប់ ក៏ដូចជាអនុម័តលើបទបញ្ជាផ្ទៃក្នុងសម្រាប់ក្រុមប្រឹក្សាភិបាលនៃ ប.ភ.យ.ក. ()
សម្តេចកិត្តិព្រឹទ្ធបណ្ឌិត ចាត់ឱ្យឯកឧត្តម គីម រិទ្ធី ចុះសួរសុខទុក្ខ និងផ្តល់អំណោយមនុស្សធម៌ជូនភរិយា និងក្រុមគ្រួសាររបស់វីរៈយុទ្ធជន ៥រូប រស់នៅខេត្តព្រះវិហារ ដែលត្រូវបានចាប់ខ្លួនក្រោយបទឈប់បាញ់ចូលជាធរមាន ()
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់ឱ្យឯកឧត្តម មាន ចាន់យ៉ាដា ចុះសួរសុខទុក្ខ និងផ្តល់អំណោយមនុស្សធម៌ជូនម្តាយបង្កេីត និងក្រុមគ្រួសាររបស់វីរៈយុទ្ធជន ១រូប រស់នៅខេត្តឧត្តរមានជ័យ ដែលត្រូវបានចាប់ខ្លួនក្រោយបទឈប់បាញ់ចូលជាធរមាន ()
វីដែអូ