ភ្នំពេញ៖ ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ និងជាអនុប្រធានប្រចាំការ អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានមានប្រសាសន៍ថា ការបង្កើត អ.ដ.ក.​ នេះឡើង ក្នុងគោលបំណងចំនួន ៣សំខាន់ គឺ៖ ទី១. បង្កើនជម្រើសបន្ថែមកាន់តែច្រើនជូនពលរដ្ឋ ក្នុងការស្វែងរកការដោះស្រាយវិវាទ, ទី២. បង្កើនភាពសុខដុមរនាជូនពលរដ្ឋក្នុងសហគមន៍មូលដ្ឋានតាមរយៈការផ្សះផ្សារវិវាទ និងទី៣. គឺជួយដល់ប្រព័ន្ធតុលាការ តាមរយៈការជួយរំដោះសំណុំរឿងមួយចំនួន ឈានដល់ការកាត់បន្ថយភាពកកស្ទះសំណុំរឿងនៅតុលាការជាដើម។

ឯកឧត្តមបណ្ឌិត ជិន ម៉ាលីន បានមានប្រសាសន៍បែបនេះ ធ្វើឡើងក្នុងឱកាសអញ្ជើញតំណាងដ៏ខ្ពង់ខ្ពស់ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក. ក្នុងសិក្ខាសាលាផ្សព្វផ្សាយ ស្តីពី បេសកកម្មនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ ដែលធ្វើឡើងនៅខេត្តកែប នារសៀលថ្ងៃទី២៩ ខែសីហា ឆ្នាំ២០២៥។ សិក្ខាសាលានេះបានការចូលរូមពីសំណាក់លោក ញ៉ន សិទ្ធ អភិបាលរងខេត្ត តំណាង​ដ៏ខ្ពង់ខ្ពស់​ ឯកឧត្តមបណ្ឌិត សោម ពិសិដ្ឋ អភិបាលខេត្តកែប និងវត្តមានឯកឧត្តម​ លោកជំទាវ​ ជាសមាជិក អ.ដ.ក. ប្រធានសាលាតំបូងខេត្ត ព្រះរាជ្ញាអមសាលាដំបូងខេត្ត ឯកឧត្តម​ លោកជំទាវ​ ក្រុមប្រឹក្សាខេត្ត​ អភិបាលរង និងអ្នកពាក់ព័ន្ធសរុបជាង ២០០នាក់។

ឯកឧត្តមបណ្ឌិត ជិន ម៉ាលីន បានមានប្រសាសន៍ថា ការបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) ជាយន្តការបំពេញបន្ថែមលើយន្តការដោះស្រាយវិវាទក្រៅប្រព័ន្ធតុលាការដែលមានស្រាប់នៅកម្ពុជា ក៏ដូចជារួមចំណែកលើកកម្ពស់យន្តការនៃការសម្រុះសម្រួលផ្សះផ្សាវិវាទក្រៅប្រព័ន្ធតុលាការឱ្យកាន់តែងាយស្រួល កាន់តែសម្បូរបែប កាន់តែខិតជិតប្រជាពលរដ្ឋនៅមូលដ្ឋាន និងកាន់តែប្រសិទ្ធភាពក្នុងការដោះស្រាយវិវាទជូនប្រជាពលរដ្ឋ។

ឯកឧត្តមបណ្ឌិត បានបញ្ជាក់ថា រាល់កំណត់ហេតុដែលចេញដោយ អាជ្ញាធរជាតិដោះស្រាយវិវាទក្រៅប្រព័ន្ធតុលាការ ក្នុងការបញ្ចប់វិវាទណាមួយមានតម្លៃស្មើនឹងសាលក្រមស្ថាពររបស់តុលាការដូច្នេះដែរ។

ឯកឧត្តមបណ្ឌិត ជិន ម៉ាលីន បានសង្កត់ធ្ងន់ថា ការបង្កើត អ.ដ.ក. នេះ ក៏ជាសមិទ្ធផលជាក់ស្តែងមួយក្រោមការដឹកនាំប្រកបដោយភាពប៉ិនប្រសប់ និងភាពប្រាកដនិយមរបស់ សម្តេចមហាបវរធិបតី ហ៊ុន ម៉ាណែត នាយក​រដ្ឋមន្ត្រី​ នៃ​ព្រះរាជាណាចក្រ​កម្ពុជា​ សំដៅសម្រេចឱ្យបាននូវទិសដៅ និងគោលនយោបាយពាក់ព័ន្ធនឹងការកែទម្រង់ប្រព័ន្ធយុត្តិធម៌ របស់រាជរដ្ឋាភិបាលនីតិកាលទី៧ នៃរដ្ឋសភានេះ ៕