ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី២៩ ខែសីហា ឆ្នាំ២០២៥ បានទទួលអំណោយមនុស្សធម៌ ជាថវិកា សម្ភារៈប្រើប្រាស់ គ្រឿងឧបភោគបរិភោគ ពីសប្បុរសជននានា ដែលមានព្រះសង្ឃ មន្រ្តីរាជការ អ្នកវិនិយោគ និងជាទីប្រឹក្សាផ្ទាល់របស់ សម្តេចប្រធាន សម្រាប់ចែកជូនបន្តដល់វីរៈកងទ័ពនៅសមរភូមិមុខ ក៏ដូចជាអ្នកកំពុងសម្រាកព្យាបាល ជំងឺ ព្រមទាំងក្រុមគ្រួសារ និងប្រជាពលរដ្ឋភៀសសឹកផងដែរ។

នៅក្នុងឱកាសទទួលអំណោយសប្បុរសធម៌នេះ សម្តេចរដ្ឋសភាធិបតី បានថ្លែងអំណរគុណយ៉ាងជ្រាលជ្រៅជូនបងប្អូនជនរួមជាតិទំាងក្នុង និងក្រៅប្រទេស ដែលបានរួមគ្នាជាធ្លុងតែមួយ ក្រោមការដឹកនាំរបស់រាជរដ្ឋាភិបាល ជាមហាសាមគ្គីជាតិយ៉ាងរឹងមាំ ការពារអធិបតេយ្យជាតិ បូរណភាពទឹកដី ធ្វើឱ្យសំឡេងខ្មែរតែមួយបានលឺខ្ទរខ្ទារលើឆាកអន្តរជាតិ បង្ហាញឱ្យឃើញច្បាស់អំពីមហិច្ឆិតាឈ្លានពានរបស់ប្រទេសថៃមកលើកម្ពុជា ហើយកម្ពុជាគឺជាអ្នកស្រឡាញ់សន្តិភាព មានការប្តេជ្ញាចិត្តម៉ឹងម៉ាត់ ការពារសុខសន្តិភាព ដោះស្រាយបញ្ហាដោយសន្តិវិធី កម្ពុជាស្អប់ខ្ពើមសង្រ្គាម។

សម្តេចប្រធានរដ្ឋសភា បានថ្លែងអំណរគុណចំពោះទឹកចិត្តមនុស្សធម៌ ដែលកើតចេញពីបេះដូងរបស់ពលរដ្ឋខ្មែរនៅគ្រប់ស្រទាប់វណ្ណៈ ដែលបានជួយដល់វីរៈកងព័ទ និងពលរដ្ឋភៀសសឹក ទោះតិចក្តីច្រើនក្តី នេះជាចលនាសាមគ្គីជាតិដ៏រឹងមាំ។

សម្តេចបានគូសបញ្ជាក់ថា ពលរដ្ឋខ្មែរ បានសាមគ្គីភាពជាធ្លុងមួយនិងជឿជាក់លើរាជរដ្ឋាភិបាល ពិសេសលើការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា អគ្គភស្តុភារកំពូល នៃកងយោធពលខេមរភូមិន្ទ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការដោះស្រាយបញ្ហាដោយភាពវៀងវៃក្នុងស្មារតីការពារអធិបតេយ្យភាពជាតិ និងបូរណភាពទឹកដីយ៉ាងប្តូរផ្តាច់ ដោយមិនភ្លេចសុខសន្តិភាពដែលជាសេចក្តីត្រូវការចាំបាច់របស់ប្រទេសជាតិនិងប្រជាពលរដ្ឋខ្មែរ ដើម្បីឈាននាំនាវាកម្ពុជាឆ្ពោះទៅកាន់ប្រទេសអភិវឌ្ឍន៍មានចំណូលមធ្យមកម្រិតខ្ពស់នៅឆ្នាំ២០៣០ ប្រទេសមានចំណូលខ្ពស់នៅឆ្នាំ២០៥០។កម្ពុជាមិនត្រូវការសង្រ្គាមនោះទេ។ មានតែសន្តិភាព ទើបមានការអភិវឌ្ឍន៍ ដូចអ្វីដែលកម្ពុជាទទួលបាននៅក្នុងរយៈពេលជាង៤០ឆ្នាំមកនេះ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន និងបានបន្តការពារ អភិវឌ្ឍន៍ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីអាណត្តិទី៧នៃរដ្ឋសភា។

សម្តេចរដ្ឋសភាធិបតី ឃួន សុដារី បានសង្កត់ធ្ងន់ថា គ្រាន់តែមានការឈា្លពានភ្លាម សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានសូមអន្តរាគមន៍ពី ឯកឧត្តមប្រធានាធិបតីអាមេរិក ដូណាល់ ត្រាំ ស្វែងរកដំណោះស្រាយដោយសន្តិវិធី បញ្ចៀសការបង្ហូរឈាមដល់ពលរដ្ឋទំាងសងខាង។ ឆ្លើយតបការអន្តរាគមន៍ដ៏មានតម្លៃរបស់ ឯកឧត្តមប្រធានាធិបតីអាមេរិក សម្តេចធិបតី ហ៊ុន ម៉ាណែត ក៏បានស្នើសុំពានរង្វាន់ណូបែលសន្តិភាព ជូនឯកឧត្តមប្រធានាធិបតីអាមេរិក។ នៅក្នុងលិខិតផ្ញើរជូនសម្តេចធិបតី វិញ ឯកឧត្តម ដូណាល់ ត្រាំ បានវាយតម្លៃថា សម្តេចធិបតី ហ៊ុន ម៉ាណែត ជាថ្នាក់ដឹកនាំដ៏ឆ្នើមមួយរូប ដែលផ្តល់តម្លៃលើជីវិតមនុស្ស និងស្រឡាញ់ សន្តិភាព និងបានគូសបញ្ជាក់ពីមោទនភាពរបស់ឯកឧត្តម ដែលបានចូលរួមជាផ្នែកមួយនៃកិច្ចព្រមព្រៀងបទឈប់បាញ់ សំដៅបញ្ចប់នូវសោកនាដកម្មនៃជម្លោះប្រដាប់អាវុធ និងបានសង្គ្រោះជីវិតមនុស្សរាប់ពាន់នាក់។

សម្តេចមហារដ្ឋសភាធិការធិបតី ឃួន សុដារី បានអំពាវនាវ ដល់ពលរដ្ឋរក្សាឱ្យបាននូវសាមគ្គីភាព ស្មារតីសន្តិភាព អត់ធ្មត់ជឿជាក់លើរាជរដ្ឋាភិបាល ដែលមានសម្តេចធិបតី ហ៊ុន ម៉ាណែត ជាប្រមុខ ប្រកបដោយថាមពល ប្រាជ្ញាវៀងវៃ និងសម្តេចតេជោ ហ៊ុន សែន នៅក្នុងការដោះស្រាយបញ្ហាជម្លោះនេះដោយសន្តិវិធី កម្កល់ផលប្រយោជន៍ជាតិជាធំ មិនឱ្យខ្មាំងសត្រូវឈ្លានពានទឹកដីបានជាដាច់ខាត់។

សូមជម្រាបថាសម្តេចរដ្ឋសភាធិបតី គ្រោងដឹកនាំសមាជិក សមាជិការដ្ឋសភានាំយកអំណោយជាសម្ភារៈ ថវិកា និងគ្រឿងឧបភោគបរិភោគ ចែកជូនដល់វីរៈកងព័ទនៅតាមសមរភូមិជួរមុខ វីរៈកងទ័ពដែលកំពុងសម្រាកព្យាបាលជំងឺ និងក្រុមគ្រួសារវីរៈកងព័ទ ពលរដ្ឋភៀសសឹក នៅក្នុងខេត្តព្រះវិហារ ខេត្តឧត្តរមានជ័យ និងខេត្តសៀមរាប ដើមខែកញ្ញាខាងមុខនេះ។ ក្រៅពីអំណោយមនុស្សធម៌ ដែលសម្តេចបានទទួលផ្ទាល់ពីសប្បុរជននៅព្រឹកនេះ ឯកឧត្តម លោកជំទាវ ដែលជាសមាជិកសមាជិកាគណៈកម្មាធិការអចិន្រ្តៃយ៍រដ្ឋសភា សមាជិកសមាជិការដ្ឋសភា និងថ្នាក់ដឹកនាំអគ្គលេខាធិការដ្ឋានរដ្ឋសភា មន្រ្តីរាជការ ក៏បានចូលរួមបរិច្ចាគថវិកា សម្ភារៈ តាមរយៈសម្តេចប្រធានរដ្ឋសភា សម្រាប់ចែកជូនវីរៈកងព័ទនិងពលរដ្ឋភៀសសឹកផងដែរ៕