ភ្នំពេញ៖ ឯកឧត្តម ជុំ សុន្ទរី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃកម្ពុជា បានដឹកនាំគណៈប្រតិភូ ចូលរួមកិច្ចប្រជុំរដ្ឋមន្ត្រីការបរទេសលើកទី១០ នៃវេទិកាកិច្ចសហប្រតិបត្តិការអាស៊ីបូព៌ា-អាមេរិកឡាទីន (FEALAC FMM) ដែលបានប្រព្រឹត្តទៅនៅទីក្រុងអ៊ូឡង់បាទ័រ ប្រទេសម៉ុងហ្គោលី ពីថ្ងៃទី២០-២២ ខែសីហា ឆ្នាំ២០២៥។នៅមុនកិច្ចប្រជុំថ្នាក់រដ្ឋមន្ត្រី នាកិច្ចប្រជុំឧត្តមមន្ត្រី FEALAC លើកទី២៤ នៅថ្ងៃទី២១ ខែសីហា ឯកឧត្តម ជុំ សុន្ទរី បានថ្លែងបទអន្តរាគមន៍ ស្ដីពីផែនការសកម្មភាពថ្មីរបស់ FEALAC ដោយបញ្ជាក់សាជាថ្មីអំពីការគាំទ្រដ៏រឹងមាំរបស់កម្ពុជាចំពោះទិសដៅអនាគតនៃវេទិកានេះ។ ឯកឧត្តម បានសង្កត់ធ្ងន់ថា “ផែនការនេះត្រូវតែបន្តរក្សានូវបរិយាប័ន ភាពជាក់ស្តែង និងការឆ្លើយតបចំអាទិភាពរបស់ប្រទេសសមាជិកទាំងអស់ ជាពិសេសប្រទេសកំពុងអភិវឌ្ឍ”។នៅក្នុងកិច្ចប្រជុំរដ្ឋមន្ត្រីការបរទេសFEALAC លើកទី១០ នៅថ្ងៃទី២២ ខែសីហា ឯកឧត្តម ជុំ សុន្ទរី ក្នុងឋានៈជាតំណាងដ៏ខ្ពង់ខ្ពស់របស់ ឯកឧត្តម ប្រាក់ សុខុន បានថ្លែងសុន្ទរកថាចំនួនពីរ។ ក្រោមរបៀបវារៈទី៣៖ "មាគ៌ាទៅកាន់អ៊ូឡង់បាទ័រ: ការឆ្លុះបញ្ចាំងក្នុងឱកាសខួបលើកទី២៥ នៃ FEALAC" ដោយឯកឧត្តម បានលើកឡើងពីសមិទ្ធផលរបស់ FEALAC រយៈពេល ២៥ ឆ្នាំកន្លងមក និងបានអំពាវនាវឱ្យមានការបង្កើនឆន្ទៈនយោបាយជាបន្ត ដើម្បីលើកកម្ពស់តួនាទីសកលរបស់FEALAC។ ក្រោមរបៀបវារៈទី៤៖ “២៥ ឆ្នាំ និងអនាគត៖ ចក្ខុវិស័យសម្រាប់អាស៊ីបូព៌ា និងអាម៉េរិកឡាទីន” ឯកឧត្តម បានគូសបញ្ជាក់ពីអាទិភាពរបស់កម្ពុជា៖ ការពង្រឹងពាណិជ្ជកម្ម វិនិយោគ និងទេសចរណ៍ ការជំរុញការអភិវឌ្ឍប្រកបដោយនិរន្តរភាព និងបរិយាបន្ន និងការលើកកម្ពស់នូវភាពលេចធ្លោរបស់ FEALAC រួមទាំងតាមរយៈកិច្ចប្រជុំកំពូលនាពេលអនាគត និងការចូលរួមកាន់តែជិតស្និទ្ធ ជាមួយអង្គការសហប្រជាជាតិ។ ឯកឧត្តម បានសង្កត់ធ្ងន់ថា "ភាពខ្លាំងនាពេលអនាគតរបស់ FEALAC អាស្រ័យលើចក្ខុវិស័យ រចនាសម្ព័ន្ធ ការប្តេជ្ញាចិត្ត និងសកម្មភាពជាក់ស្តែង"។អំឡុងពេលនៃកិច្ចប្រជុំថ្នាក់រដ្ឋមន្រ្តីការបរទេសនេះដែរ ឯកឧត្តម ជុំ សុន្ទរី បានចូលជួបសម្តែងការគួរសម ជាមួយលោកជំទាវ Battsetseg Batmunkh រដ្ឋមន្ត្រីការបរទេសម៉ុងហ្គោលី និងជាសហប្រធាននៃ FEALAC FMM ទី១០ ហើយបានជួបពិភាក្សាជាមួយប្រធានគណៈប្រតិភូនៃប្រទេសកូឡុំប៊ី និងស៊ីលី ផងដែរ។គួរឱ្យកត់សម្គាល់ផងដែរថា FEALAC មានរដ្ឋសមាជិកចំនួន ៣៦ប្រទេស គឺ ១៦ប្រទេស មកពីអាស៊ីបូព៌ា រួមទាំងប្រទេសអាស៊ានទាំងអស់ និង ២០ប្រទេស មកពីប្រទេសអាម៉េរិកឡាទីន និងការាបៀន ៕
ព័ត៌មានគួរចាប់អារម្មណ៍
សម្តេចមហាបវរធិបតី ហ៊ុន ម៉ាណែត ដឹកនាំគណៈប្រតិភូអញ្ជើញចូលរួមកិច្ចប្រជុំកំពូលអង្គការកិច្ចសហប្រតិបត្តិការសៀងហៃបូក នៅទីក្រុងធានជីន ប្រទេសចិន ()
ឧបនាយករដ្ឋមន្ត្រី កើត រិទ្ធ ដឹកនាំកិច្ចប្រជុំលើកទី៤ នៃក្រុមប្រឹក្សាភិបាលបណ្ឌិត្យសភាភូមិន្ទយុត្តិធម៌កម្ពុជា ដើម្បីពិនិត្យ និងពិភាក្សាលើលទ្ធផលនៃកិច្ចដំណើរការរបស់ ប.ភ.យ.ក. និងលក្ខណវិនិច្ឆ័យនិងលក្ខណសម្បត្តិសម្រាប់ជ្រើសរើសគ្រូបង្រៀននៃ ប.ភ.យ.ក. និងអនុម័តលើបញ្ជីឈ្មោះបេក្ខជន វិញ្ញាសា និងកាលបរិច្ឆេទនៃការប្រឡងប្រជែងជ្រើសរើសសិស្សវិជ្ជាជីវៈតុលាការ និងវិជ្ជាជីវៈច្បាប់ ក៏ដូចជាអនុម័តលើបទបញ្ជាផ្ទៃក្នុងសម្រាប់ក្រុមប្រឹក្សាភិបាលនៃ ប.ភ.យ.ក. ()
សម្តេចកិត្តិព្រឹទ្ធបណ្ឌិត ចាត់ឱ្យឯកឧត្តម គីម រិទ្ធី ចុះសួរសុខទុក្ខ និងផ្តល់អំណោយមនុស្សធម៌ជូនភរិយា និងក្រុមគ្រួសាររបស់វីរៈយុទ្ធជន ៥រូប រស់នៅខេត្តព្រះវិហារ ដែលត្រូវបានចាប់ខ្លួនក្រោយបទឈប់បាញ់ចូលជាធរមាន ()
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់ឱ្យឯកឧត្តម មាន ចាន់យ៉ាដា ចុះសួរសុខទុក្ខ និងផ្តល់អំណោយមនុស្សធម៌ជូនម្តាយបង្កេីត និងក្រុមគ្រួសាររបស់វីរៈយុទ្ធជន ១រូប រស់នៅខេត្តឧត្តរមានជ័យ ដែលត្រូវបានចាប់ខ្លួនក្រោយបទឈប់បាញ់ចូលជាធរមាន ()
រដ្ឋមន្ត្រីក្រសួងសាធារណការ អនុញ្ញាតឱ្យអ្នកគ្រប់គ្រងទូទៅក្រុមហ៊ុនដឹកជញ្ជូន CMA CGM Group ប្រចាំកម្ពុជា-វៀតណាម ចូលជួបពិភាក្សាការងារពាក់ព័ន្ធនឹងកាលានុវឌ្ឍនភាពក្នុងចូលរួមចំណែកអភិវឌ្ឍន៍វិស័យដឹកជញ្ជូន និងភស្តុភារកម្មនៅកម្ពុជា ()
វីដែអូ