រដ្ឋមន្ត្រីក្រសួងអភិវឌ្ឍន៍ជនបទ អញ្ជើញទៅពិនិត្យវឌ្ឍនភាពនៃការសាងសង់ផ្លូវជនបទ ចំនួន ៣ខ្សែ នៅក្នុងស្រុកឯកភ្នំ ខេត្តបាត់ដំបង
(បាត់ដំបង)៖ នាថ្ងៃសៅរ៍ ១៤រោច ខែស្រាពណ៍ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី២៣ ខែសីហា ឆ្នាំ២០២៥ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមដំណើរដោយ ឯកឧត្តមជាថ្នាក់ដឹកនាំ បានដឹកនាំមន្រ្ដីបច្ចេកទេសក្រសួង និងមន្ទីរអភិវឌ្ឍន៍ជនបទខេត្តបាត់ដំបង អញ្ជើញទៅពិនិត្យវឌ្ឍនភាពនៃការសាងសង់ផ្លូវជនបទ ចំនួន ៣ខ្សែ នៅក្នុងស្រុកឯកភ្នំ ខេត្តបាត់ដំបង មានដូចខាងក្រោម៖
-ខ្សែទី១៖ (តាពុន-ទួលអំពិល) មានប្រវែងសរុប ៦,១៨ គ.ម ទទឹងប្រវែង ៦ម៉ែត្រ ចិញ្ចើមសង្ខាងម្ខាងៗប្រវែង ១ម៉ែត្រ ក្នុងនោះផ្លូវក្រាលកៅស៊ូពីរជាន់ (DBST) ប្រវែង ៥,៩៣ គ.ម និងក្រាលបេតុង (RC) ០,២៥ គ.ម មានលូប្រអប់ចំនួន ២កន្លែង លូមូលចំនួន ១០កន្លែង តភ្ជាប់ពីភូមិតាកុក ឃុំសំរោងក្នុង ទៅដល់ភូមិព្រែកខ្ទប់ ឃុំព្រែកហ្លួង ស្រុកឯកភ្នំ ខេត្តបាត់ដំបង វឌ្ឍនភាពសម្រេចលទ្ធផលបាន ១០០%។ ខ្សែផ្លូវនេះ មានអ្នកទទួលផលដោយផ្ទាល់ចំនួន ៦.៤២២គ្រួសារ ស្មើនឹង ២២.៦០២នាក់ និងដោយប្រយោលចំនួន ២.៧៣២គ្រួសារ ស្មើនឹង ១២.៩១២នាក់។
-ខ្សែទី២៖ (អូរស្តី-អូរកំបុត) ប្រវែងសរុប ២,០៥ គ.ម ទទឹងប្រវែង ៦ម៉ែត្រ ចិញ្ចើមសង្ខាងម្ខាងៗប្រវែង ១ម៉ែត្រ ក្នុងនោះផ្លូវក្រាលកៅស៊ូពីរជាន់ (DBST) ប្រវែង ១,៤០ គ.ម និងក្រាលបេតុង (RC) ០,៦ ៥គ.ម មានលូប្រអប់ចំនួន ២កន្លែង តភ្ជាប់ពីភូមិព្រែកហ្លួង ឃុំព្រែកនរិន្ទ ទៅដល់ភូមិស្ពឺលើ ឃុំព្រែកហ្លួង ស្រុកឯកភ្នំ ខេត្តបាត់ដំបង វឌ្ឍនភាពសម្រេចលទ្ធផលបាន ៩១,០២%។ ខ្សែផ្លូវនេះ មានអ្នកទទួលផលផ្ទាល់ចំនួន ១.០៧០គ្រួសារ ស្មើនឹង ៥.១៣៨នាក់ និងដោយប្រយោលចំនួន ១.២២៦គ្រួសារ ស្មើនឹង ៣.៩៥៦នាក់។
-ខ្សែទី៣៖ (តាគម-ព្រែកនរិន្ទ) មានប្រវែងសរុប ១០,២៤ គ.ម ទទឹងប្រវែង ៦ម៉ែត្រ ចិញ្ចើមសង្ខាងម្ខាងៗប្រវែង ១ម៉ែត្រ ក្នុងនោះផ្លូវក្រាលកៅស៊ូពីរជាន់ (DBST) ប្រវែង ៩,០៩ គ.ម និងក្រាលបេតុង (RC) ១,១៥ គ.ម មានលូប្រអប់ចំនួន ៥កន្លែង លូមូលចំនួន ១៣កន្លែង តភ្ជាប់ពីភូមិព្រែកឆ្តោ ឃុំពាមឯក ទៅដល់ភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង វឌ្ឍនភាពសម្រេចលទ្ធផលបាន ៨៥,២១%។ ខ្សែផ្លូវនេះ មានអ្នកទទួលផលផ្ទាល់ចំនួន ៣.០៣៤គ្រួសារ ស្មើនឹង ១៣.៧០៤នាក់ និងដោយប្រយោលចំនួន ៤.៣៦០គ្រួសារ ស្មើនឹង ២៥.៨៦១នាក់។
ខ្សែផ្លូវទាំង ៣ខ្សែនេះស្ថិតក្នុងក្របខ័ណ្ឌគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទដើម្បីទីផ្សារកសិករ និងពាណិជ្ជូបនីយកម្មកសិកម្ម (SAAMBAT) ដែលជាកិច្ចសហប្រតិបត្តិការរវាងរាជរដ្ឋាភិបាលកម្ពុជា មូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) ធនាគារវិនិយោគអឺរ៉ុប (EIB) និងមូលនិធិវិនិយោគអាស៊ី នៃសហភាពអឺរ៉ុប (EU-AIF) ដែលបាននិងកំពុងបម្រើផលប្រយោជន៍ដល់ប្រជាពលរដ្ឋដោយផ្ទាល់សរុបចំនួន ១០.៥២៦គ្រួសារ ស្មើនឹង ៤១.៤៤៤នាក់ និងដោយប្រយោលចំនួន ៨.៣១៨គ្រួសារ ស្មើនឹង ៤២.៧២៩នាក់។
ក្នុងឱកាសនោះផងដែរ ឯកឧត្តមរដ្ឋមន្ត្រី បានណែនាំដល់មន្ត្រីបច្ចេកទេសថ្នាក់ក្រសួង និងថ្នាក់មន្ទីរ ឱ្យខិតខំយកចិត្តទុកដាក់ក្នុងការត្រួតពិនិត្យបទដ្ឋានបច្ចេកទេស ដើម្បីធានាផ្លូវមានគុណភាពសម្រាប់ការប្រើប្រាស់យូរអង្វែង ព្រមទាំងការការពារសុវត្ថិភាពដល់ការធ្វើដំណើរផងដែរ។
គួរជម្រាបជូនផងដែថា ប្រជាពលរដ្ឋដែលរស់នៅតាមសងខាងផ្លូវ បានសម្ដែងនូវការសាទរ និងថ្លែងអំណរគុណចំពោះរាជរដ្ឋាភិបាល ក្រោមការដឹកនាំប្រកបដោយថាមវន្ដរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា តាមរយៈក្រសួងអភិវឌ្ឍន៍ជនបទ ដែលបានផ្ដល់ផ្លូវថ្មី មានភាពងាយស្រួលសម្រាប់ការធ្វើដំណើរ ការដឹកជញ្ជូន និងការប្រកបមុខរបបផ្សេងៗ ដែលផ្ទុយពីអតីតកាលផ្លូវមានសភាពលំបាកដោយសារជង្ហុកធំៗ រអិល និងហុយ ដែលបណ្ដាលឱ្យមានគ្រោះថ្នាក់ជាញឹកញាប់ និងប៉ះពាល់ដល់សុខភាពរបស់ប្រជាពលរដ្ឋផងដែរ។
បន្ទាប់មកឯកឧត្តមរដ្ឋមន្ត្រី និងប្រតិភូរួមដំណើរ បានអញ្ជើញពិនិត្យស្ថានភាពផ្លូវមួយខ្សែទៀត មានប្រវែង ៩,២០ គ.ម តភ្ជាប់ពីភូមិកគរ ឃុំអូតាគី ស្រុកថ្មគោល ទៅកាន់ភូមិតាគម ឃុំពាមឯក ស្រុកឯកភ្នំ ខេត្តបាត់ដំបង។ ផ្លូវ១ខ្សែនេះ ត្រូវបានសាងសង់ក្នុងឆ្នាំ២០១៧ ក្នុងក្របខ័ណ្ឌកម្មវិធីកែលម្អហេដ្ឋារចនាសម្ព័ន្ធជនបទជំហានទី៤ (RIP4)។ ដោយសារស្ថានភាពផ្លូវមានសភាពខូចខាតច្រើន ឯកឧត្តមរដ្ឋមន្ត្រី ក៏បានណែនាំដល់មន្ត្រីបច្ចេកទេសក្រសួង និងមន្ទីរ ពិនិត្យលទ្ធភាពដាក់ខ្សែផ្លូវនេះ ក្នុងគម្រោងស្ដារឡើងវិញផ្លូវជនបទរបស់ក្រសួងនាឆ្នាំបន្ទាប់ ដើម្បីលើកកម្ពស់សក្ដានុពលទេសចរណ៍ និងសេដ្ឋកិច្ចក្នុងតំបន់ឱ្យកាន់តែប្រសើរឡើងនាពេលអនាគត ៕
