ភ្នំពេញ៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា ព្រមទាំងក្រុមតំណាងរាស្ត្រមណ្ឌលព្រៃវែង នាព្រឹកថ្ងៃទី២៣ ខែសីហា ឆ្នាំ២០២៥ បានអញ្ជើញជួបសំណេះសំណាលជាមួយអាជ្ញាធរដែនដី និងប្រជាពលរដ្ឋប្រមាណជាង ៣០០នាក់ នៅក្នុងស្រុកកំពង់ត្របែក ខេត្តព្រៃវែង។

បន្ទាប់ពីលោក ប៉ិល ឆន ប្រធានក្រុមប្រឹក្សាស្រុកកំពង់ត្របែក បានជម្រាបជូនពីស្ថានភាពទូទៅនៃការរស់នៅរបស់ប្រជាពលរដ្ឋនៅក្នុងស្រុកកំពង់ត្របែក រួចមកឯកឧត្តមកិត្តិសេដ្ឋាបណ្ឌិត ជាម យៀប តំណាងឱ្យតំណាងរាស្ត្រទាំង ១០រូប នៃមណ្ឌលព្រៃវែង បានសម្តែងនូវការដឹងគុណ និងអំណរគុណយ៉ាងជ្រាលជ្រៅចំពោះប្រជាជនកម្ពុជាទូទាំងប្រទេសនិយាយជារួម និយាយដោយឡែកសំរាប់ប្រជាជនខេត្តព្រៃវែង ពិសេសប្រជាជននៅក្នុងស្រុកកំពង់ត្របែក ដែលរយៈកាលកន្លងមក នៅក្នុងពេលបោះឆ្នោតជ្រើសតាំងតំណាងរាស្រ្ត នីតិកាលទី៧ បានអញ្ជើញទៅចូលរួមបោះឆ្នោតជូនគណបក្សប្រជាជនកម្ពុជា ឱ្យទទួលបានជោគជ័យភ្លូកទឹកភ្លូកដីទូទាំងប្រទេស ទទួលបាន ១២០អាសនៈ លើ ១២៥អាសនៈ ដោយឡែកមណ្ឌលខេត្តព្រៃវែង ទទួលបាន ១០អាសនៈ លើ ១១អាសនៈ។

ឯកឧត្តមកិត្តិសេដ្ឋាបណ្ឌិត ជាម យៀប ក៏បានលើកឡើងពីរដ្ឋសភាជាតិ ក្នុងនីតិកាលទី៧ ដឹកនាំដោយសម្តេចមហារដ្ឋសភាធិការធិបតី ឃួន សុដារី ដែលជាស្ត្រីទី១ បានទទួលតំណែងដ៏ខ្ពង់ខ្ពស់ជាប្រធានរដ្ឋសភា ហើយរាជរដ្ឋាភិបាលដឹកនាំដោយ សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តីវ័យក្មេង មានសមត្ថភាពខ្ពស់ និងទេពកោសល្យដ៏ប៉ិនប្រសប់ ដើម្បីបន្តថែរក្សាសុខសន្តិភាព ឯកភាពជាតិ បូរណភាពទឹកដី ស្ថិរភាពនយោបាយ អភិវឌ្ឍន៍សង្គមសេដ្ឋកិច្ច និងវប្បធម៌ សំដៅលើកកម្ពស់ជីវភាពរស់នៅរបស់ប្រជាពលរដ្ឋនៅទូទាំងព្រះរាជាណាចក្រកម្ពុជា ឱ្យកាន់តែល្អប្រសើរឡើង ហើយក៏បានឆ្លុះបញ្ចាំងពីការផ្ទេរអំណាចដោយរលូន និងសន្តិវិធី ដែលមិនធ្លាប់មាននៅក្នុងប្រវត្តិសាស្រ្ត នៃប្រទេសកម្ពុជា។

នាឱកាសនោះ ឯកឧត្តមកិត្តិសេដ្ឋាបណ្ឌិត ជាម យៀប ក៏បានជម្រាបជូនប្រជាពលរដ្ឋស្រុកកំពង់ត្របែកពីសភាពការណ៍នៅតាមព្រំដែនកម្ពុជា-ថៃ ដែលកាលពីថ្ងៃទី២៨ ខែឧសភា ឆ្នាំ២០២៥ យោធាថៃ បានបាញ់សម្លាប់យោធាកម្ពុជា នៅតំបន់មុំបី នៃខេត្តព្រះវិហារ ហើយបង្កើតជាជម្លោះបន្តបន្ទាប់ រហូតផ្ទុះអាវុធនៅតាមខ្សែបន្ទាត់ព្រំដែនកម្ពុជា-ថៃ។ ថៃ បានបង្កហេតុនិងបង្កើតជម្លោះមកលើកម្ពុជាមុន ហើយមុនឈានដល់ការផ្ទុះអាវុធ គឺភាគីថៃបានបិទព្រំដែនជាឯកតោភាគី និងបានប្រើប្រាស់សេដ្ឋកិច្ចជាអាវុធ ក្នុងការដាក់សម្ពាធមកលើរាជរដ្ឋាភិបាលកម្ពុជា។ ប៉ុន្តែវាមិនបានធ្វើឱ្យរាជរដ្ឋាភិបាលកម្ពុជា ភ័យខ្លាចនិងចុះញ៉មឡើយ ផ្ទុយទៅវិញ រាជរដ្ឋាភិបាលកម្ពុជាបានវាយបកតបតវិញទៅភាគីថៃយ៉ាងចាស់ដៃ។ ជាលទ្ធផលរយៈពេលជិត ២ខែ ភាគីថៃ មិនអាចធ្វើអ្វីមកលើកម្ពុជាឡើយ។ ដោយសារភាគីថៃធ្លាប់មានគំនិតមើលស្រាលលើកម្ពុជា និងប្រើប្រាស់យុទ្ធសាស្រ្តអស់ហើយនោះ ភាគីថៃក៏ប្រើប្រាស់ស្នៀតចុងក្រោយ ដើម្បីគាបសង្កត់មកលើកម្ពុជា តាមរយៈការប្រើប្រាស់កម្លាំងយោធា។

ឯកឧត្តមកិត្តិសេដ្ឋាបណ្ឌិត ជាម យៀប បានបន្តថា កន្លងទៅថ្មីៗនេះ រាជរដ្ឋាភិបាលកម្ពុជា សម្រេចបាននូវលទ្ធផលដ៏ត្រចះត្រចង់ពីជំនួបពិភាក្សារវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាមួយនាយករដ្ឋមន្ត្រីស្តីទីនៃព្រះរាជាណាចក្រថៃ ដោយភាគីទាំងពីរកម្ពុជា-ថៃ បានឯកភាពគ្នាលើបទឈប់បាញ់បន្ទាន់ ឥតលក្ខខណ្ឌ ដែលបានចូលជាធរមាន កាលពីវេលារំលងអាធ្រាតម៉ោង ២៤:០០នាទីយប់ថ្ងៃទី២៨ ឈានចូលថ្ងៃទី២៩ ខែកក្កដា ឆ្នាំ២០២៥ ដោយភាគីទាំងពីរបានបញ្ឈប់ការប្រយុទ្ធតតាំងគ្នាទាំងស្រុង។ រដ្ឋសភា នៃព្រះរាជាណាចក្រកម្ពុជា ក៏សូមថ្លែងអំណរគុណយ៉ាងជ្រាលជ្រៅ ចំពោះ ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក ដែលបានផ្តួចផ្តើមគំនិតបង្កើតឲ្យមានបទឈប់បាញ់ និងសន្តិភាពរវាងកម្ពុជានិងថៃ ដែលគំនិតនេះ គឺជាសមិទ្ធផលដ៏អស្ចារ្យ បានជួយសង្គ្រោះជីវិតមនុស្សយ៉ាងច្រើនទាំងនៅកម្ពុជានិងថៃ។ ឯកឧត្តមកិត្តិសេដ្ឋាបណ្ឌិត ក៏បានថ្លែងអំណរគុណដល់ ឯកឧត្តមនាយករដ្ឋមន្ត្រីម៉ាឡេស៊ី អាន់វ៉ា អ៉ីប្រាហ៊ីម ដែលបានជួយសម្របសម្រួលរៀបចំកិច្ចប្រជុំរវាងនាយករដ្ឋមន្ត្រីនៃប្រទេសទាំងពីរ ដោយមានការចូលរួមជាសាក្សីរបស់តំណាងភាគីចិន និសសហរដ្ឋអាមេរិកផងដែរ បានធ្វើឱ្យមានកិច្ចព្រមព្រៀងបទឈប់បាញ់ និងសន្តិភាពនេះ កំពុងទទួលបានលទ្ធផលល្អ និងប្រកបដោយប្រសិទ្ធភាព ៕