ក្រសួងសុខាភិបាល បើកសិក្ខាសាលាពិគ្រោះយោបល់ ស្តីពីការអភិវឌ្ឍផែនការសកម្មភាពសម្រាប់គម្រោងផ្តួចផ្តើមជាពិសេសសម្រាប់សុខភាពផ្លូវចិត្តនៅកម្ពុជា
ភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នាព្រឹកថ្ងៃពុធ ៥កើត ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៣០ ខែកក្កដា ឆ្នាំ២០២៥ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានអញ្ជើញជាអធិបតីបើកសិក្ខាសាលាពិគ្រោះយោបល់ ស្តីពីការអភិវឌ្ឍផែនការសកម្មភាពសម្រាប់គម្រោងផ្តួចផ្តើមជាពិសេសសម្រាប់សុខភាពផ្លូវចិត្តនៅកម្ពុជា។
សិក្ខាសាលាពិគ្រោះយោបល់នេះ រៀបចំឡើងរយៈពេល ០៣ថ្ងៃ ក្នុងគោលបំណង៖
– ការអភិវឌ្ឍផែនការសកម្មភាពសម្រាប់គម្រោងផ្តួចផ្តើមជាពិសេសសម្រាប់សុខភាពផ្លូវចិត្តនៅកម្ពុជា
– ពិគ្រោះយោបល់ និងផ្តល់ធាតុចូលសំខាន់ៗ សម្រាប់ការវាយតម្លៃស្ថានភាពសុខភាពផ្លូវចិត្ត នៅកម្ពុជា
– ចែករំលែកបទពិសោធន៍ ស្ដីពីការអន្តរាគមន៍ឆ្លើយតបនឹងជំងឺផ្លូវចិត្តកន្លងមក
ក្នុងឱកាសនោះដែរ លោកជំទាវរដ្ឋលេខាធិការ ក៏បានលើកឡើងអំពីចំណុចមួយចំនួនសម្រាប់ជាធាតុចូលក្នុងការពិគ្រោះយោបល់៖
១. ភាពជាអ្នកដឹកនាំ នៃសុខភាពផ្លូវចិត្ត (Mental health leadership)ឬសុខភាពផ្លូវចិត្តសាធារណៈ (Public mental health)
២. ការគ្របដណ្តប់សេវាសុខភាពផ្លូវចិត្ត និង ការធ្វើសមាហរណកម្ម
៣. ការអភិវឌ្ឍធនធានមនុស្សផ្នែកសុខភាពផ្លូវចិត្ត ធានាការថែទាំព្យាបាល
៤. ការចូលរួម ជាមួយក្រសួងស្ថាប័នពាក់ព័ន្ធ និងអជ្ញាធរមូលដ្ឋាន
៥. លើកកម្ពស់ការស្រាវជ្រាវ ផ្នែកសុខភាពផ្លូវចិត្ត
៦. រៀបចំ និងអភិវឌ្ឍន៍ឌីជីថលកម្ម (Digitalization) និងនុវានុវត្ត។
សិក្ខាសាលាពិគ្រោះយោបល់នេះ មានការអញ្ជើញចូលរួមពីសំណាក់ ឯកឧត្តម លោកជំទាវ រដ្ឋលេខាធិការ និងអនុរដ្ឋលេខាធិការ អគ្គនាយក ក្រសួងសុខាភិបាល និងក្រសួងពាក់ព័ន្ធ តំណាងអភិបាល នៃគណៈអភិបាល រាជធានី ខេត្ត មន្ទីរពេទ្យជាតិ តំណាងអង្គការសុខភាពពិភពលោកក្នុងតំបន់ ប៉ាស៊ីហ្វិក និងគណៈប្រតិភូ ដែលដឹកនាំដោយលោកស្រីវេជ្ជបណ្ឌិត ហួង ត្រាន់ (Houng Tran) លោកតំណាងអង្គការសុខភាពពិភពលោកប្រចាំកម្ពុជា អង្គការអន្តរជាតិ និងសិក្ខាកាមអញ្ជើញមកពីអង្គភាព រាជធានី ខេត្ត សរុបចំនួន ៣០០នាក់។
