ភ្នំពេញ៖ នៅថ្ងៃចន្ទ ទី០៣ ខែមីនា ឆ្នាំ២០២៥ លោកបណ្ឌិត Santo Darmosumarto ឯកអគ្គរដ្ឋទូតឥណ្ឌូនេស៊ីប្រចាំកម្ពុជា បានជួបពិភាក្សាការងារជាមួយ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងបានពិភាក្សាប្រកបដោយប្រសិទ្ធភាព លើកិច្ចសហប្រតិបត្តិការ ក្នុងការដោះស្រាយឧក្រិដ្ឋកម្មឆ្លងដែន។ កិច្ចប្រជុំនេះបានធ្វើឡើងជាការតាមដានយ៉ាងសំខាន់ចំពោះការពិភាក្សារបស់លោកឯកអគ្គរដ្ឋទូត Santo ជាមួយនាយឧត្តមសេនីយ៍ ស ថេត អគ្គស្នងការនគរបាលជាតិកម្ពុជា នៅថ្ងៃទី២៣ ខែមករា ឆ្នាំ២០២៥។ លោកឯកអគ្គរដ្ឋទូត Santo បានថ្លែងអំណរគុណចំពោះការគាំទ្ររបស់នគរបាលកម្ពុជាក្នុងការធានាសុវត្ថិភាព និងសុខុមាលភាពរបស់ប្រជាជនឥណ្ឌូនេស៊ីដែលកំពុងរស់នៅក្នុងប្រទេស។ លោកបានគូសបញ្ជាក់ថា «អាណត្តិសំខាន់មួយនៃការចាត់តាំងរបស់ខ្ញុំនៅទីនេះ គឺជួយសម្រួល និងការពារពលរដ្ឋឥណ្ឌូនេស៊ី។ គោលដៅនេះនឹងមិនអាចសម្រេចបានឡើយ បើគ្មានការសហការខ្លាំងពីនគរបាលកម្ពុជា ជាពិសេសនគរបាលរាជធានីភ្នំពេញ»។ ដោយមានជនជាតិឥណ្ឌូនេស៊ីជាង ១៣០,០០០ នាក់ដែលកំពុងរស់នៅក្នុងប្រទេសកម្ពុជា ស្ថានទូតឥណ្ឌូនេស៊ីប្រចាំនៅទីក្រុងភ្នំពេញបានឃើញការកើនឡើងនៃករណីទាក់ទងនឹងបញ្ហាកុងស៊ុល ដែលឈានដល់របាយការណ៍ជាង ៣,០០០ ។ ចំនួនដ៏ច្រើននៃករណីទាំងនេះពាក់ព័ន្ធនឹងជនជាតិឥណ្ឌូនេស៊ីដែលជាប់ពាក់ព័ន្ធក្នុងសកម្មភាពខុសច្បាប់ ឬឧក្រិដ្ឋជន ទាំងជនរងគ្រោះ ក៏ដូចជាជនល្មើស។ ឯកឧត្តម ឧត្តមសេនីយ៍ឯក ជួន ណារិន បានពាំនាំនូវការប្ដេជ្ញាចិត្តរបស់រដ្ឋាភិបាលកម្ពុជា ក្នុងការធានាសុវត្ថិភាពជូនប្រជាពលរដ្ឋបរទេសទាំងអស់ ដែលរស់នៅក្នុងប្រទេសកម្ពុជា។ លោកបន្ថែមថា រដ្ឋាភិបាលបានបង្កើនកិច្ចខិតខំប្រឹងប្រែងប្រយុទ្ធប្រឆាំងនឹងឧក្រិដ្ឋកម្មឆ្លងដែន ដូចជាការបោកប្រាស់តាមប្រព័ន្ធអ៊ីនធឺណិត។ ការបង្កើតគណៈកម្មការលុបបំបាត់ការបោកប្រាស់តាមប្រព័ន្ធអ៊ីនធឺណេតនាពេលថ្មីៗនេះ ដែលដឹកនាំផ្ទាល់ដោយលោកនាយករដ្ឋមន្ត្រី ហ៊ុន ម៉ាណែត គឺជាផ្នែកនៃកិច្ចខិតខំប្រឹងប្រែងនេះ។ លោកឯកអគ្គរដ្ឋទូត Santo បានស្វាគមន៍ចំពោះគំនិតផ្តួចផ្តើមនេះ ដោយកត់សម្គាល់ថា ជំហានបែបនេះមានសារៈសំខាន់ក្នុងការការពារផលប្រយោជន៍របស់ជនបរទេសនៅកម្ពុជា រួមទាំងប្រជាជនឥណ្ឌូនេស៊ីផងដែរ។ ទន្ទឹមនឹងនោះ ដោយទទួលស្គាល់ថា ឧក្រិដ្ឋកម្មឆ្លងដែនមិនអាចដោះស្រាយដោយប្រទេសមួយដោយខ្លួនឯងបានទេ លោកឯកអគ្គរដ្ឋទូត Santo បានបង្ហាញពីការប្តេជ្ញាចិត្តរបស់រដ្ឋាភិបាលឥណ្ឌូនេស៊ីក្នុងការធ្វើការរួមគ្នាជាមួយប្រទេសកម្ពុជាលើបញ្ហានេះ។ កិច្ចប្រជុំនេះបានបង្កើតឡើងលើកិច្ចសហប្រតិបត្តិការនិងការសម្របសម្រួលយ៉ាងជិតស្និទ្ធដែលបានវិវឌ្ឍន៍រវាងស្ថានទូតឥណ្ឌូនេស៊ីប្រចាំនៅភ្នំពេញ និងនគរបាលរាជធានីភ្នំពេញ។ នៅក្នុងរូបភាពធំជាងនេះ សមិទ្ធិផលបែបនេះបានបង្ហាញពីការខិតខំប្រឹងប្រែងរួមគ្នាក្នុងការពង្រឹងទំនាក់ទំនងទ្វេភាគី ក៏ដូចជាការលើកកម្ពស់ស្ថិរភាព និងសន្តិសុខនៅក្នុងតំបន់៕
ព័ត៌មានគួរចាប់អារម្មណ៍
សម្តេចមហាបវរធិបតី ហ៊ុន ម៉ាណែត ដឹកនាំគណៈប្រតិភូអញ្ជើញចូលរួមកិច្ចប្រជុំកំពូលអង្គការកិច្ចសហប្រតិបត្តិការសៀងហៃបូក នៅទីក្រុងធានជីន ប្រទេសចិន ()
ឧបនាយករដ្ឋមន្ត្រី កើត រិទ្ធ ដឹកនាំកិច្ចប្រជុំលើកទី៤ នៃក្រុមប្រឹក្សាភិបាលបណ្ឌិត្យសភាភូមិន្ទយុត្តិធម៌កម្ពុជា ដើម្បីពិនិត្យ និងពិភាក្សាលើលទ្ធផលនៃកិច្ចដំណើរការរបស់ ប.ភ.យ.ក. និងលក្ខណវិនិច្ឆ័យនិងលក្ខណសម្បត្តិសម្រាប់ជ្រើសរើសគ្រូបង្រៀននៃ ប.ភ.យ.ក. និងអនុម័តលើបញ្ជីឈ្មោះបេក្ខជន វិញ្ញាសា និងកាលបរិច្ឆេទនៃការប្រឡងប្រជែងជ្រើសរើសសិស្សវិជ្ជាជីវៈតុលាការ និងវិជ្ជាជីវៈច្បាប់ ក៏ដូចជាអនុម័តលើបទបញ្ជាផ្ទៃក្នុងសម្រាប់ក្រុមប្រឹក្សាភិបាលនៃ ប.ភ.យ.ក. ()
សម្តេចកិត្តិព្រឹទ្ធបណ្ឌិត ចាត់ឱ្យឯកឧត្តម គីម រិទ្ធី ចុះសួរសុខទុក្ខ និងផ្តល់អំណោយមនុស្សធម៌ជូនភរិយា និងក្រុមគ្រួសាររបស់វីរៈយុទ្ធជន ៥រូប រស់នៅខេត្តព្រះវិហារ ដែលត្រូវបានចាប់ខ្លួនក្រោយបទឈប់បាញ់ចូលជាធរមាន ()
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់ឱ្យឯកឧត្តម មាន ចាន់យ៉ាដា ចុះសួរសុខទុក្ខ និងផ្តល់អំណោយមនុស្សធម៌ជូនម្តាយបង្កេីត និងក្រុមគ្រួសាររបស់វីរៈយុទ្ធជន ១រូប រស់នៅខេត្តឧត្តរមានជ័យ ដែលត្រូវបានចាប់ខ្លួនក្រោយបទឈប់បាញ់ចូលជាធរមាន ()
រដ្ឋមន្ត្រីក្រសួងសាធារណការ អនុញ្ញាតឱ្យអ្នកគ្រប់គ្រងទូទៅក្រុមហ៊ុនដឹកជញ្ជូន CMA CGM Group ប្រចាំកម្ពុជា-វៀតណាម ចូលជួបពិភាក្សាការងារពាក់ព័ន្ធនឹងកាលានុវឌ្ឍនភាពក្នុងចូលរួមចំណែកអភិវឌ្ឍន៍វិស័យដឹកជញ្ជូន និងភស្តុភារកម្មនៅកម្ពុជា ()
វីដែអូ