ភ្នំពេញ៖ ក្នុងនាមជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានសម្តែងការលើកទឹកចិត្តដល់អង្គការដៃគូជាតិ និងអន្តរជាតិ ដែលបានចូលរួមគាំទ្រ និងសហការជាមួយរាជរដ្ឋាភិបាល តាមរយៈគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ទាំងនៅថ្នាក់ជាតិ និងថ្នាក់ក្រោមជាតិ ក្នុងការអនុវត្តយុទ្ធសាស្រ្តទាំងបួន ដែលត្រូវបានកំណត់ដោយឯកភាពគ្នា ក្នុងផែនការយុទ្ធសាស្រ្តជាតិប្រយុទ្ធប្រឆាំងអំពើជួញដូរមនុស្ស ព្រមទាំងបានណែនាំដល់អាជ្ញាធរជាប់ព្រំដែនត្រៀមលក្ខណៈបង្ការ និងទប់ស្កាត់ជនអន្ដោប្រវេសន៍ ចេញ-ចូលកម្ពុជា ដោយខុសច្បាប់ នាឱកាសបុណ្យចូលឆ្នាំខ្មែរ។ ការថ្លែងបែបនេះក្នុងឱកាសដែលឯកឧត្តមអភិសន្តិបណ្ឌិត អញ្ជើញជាអធិបតីក្នុងពិធីផ្សព្វផ្សាយរបាយការណ៍ជាតិស្តីពីលទ្ធផលការងារប្រយុទ្ធប្រឆាំងអំពើជួញដូរមនុស្ស ឆ្នាំ២០២៤ និងលើកទិសដៅឆ្នាំ២០២៥ របស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) នាព្រឹកថ្ងៃទី២៧ ខែមីនា ឆ្នាំ២០២៥ នៅសាលប្រជុំ នៃទីស្តីការក្រសួងមហាផ្ទៃ។ពីវេទិកានោះដែរ ប្រមុខក្រសួងមហាផ្ទៃ បានលើកឡើងថា ពិធីផ្សព្វផ្សាយលទ្ធផលការងាររបស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ត្រូវបានធ្វើឡើងជាប្រចាំ ដើម្បីចែកជូនសាធារណជន អ្នកសារព័ត៌មានជាតិ និងអន្តរជាតិ បានជ្រាបអំពីកិច្ចខិតខំប្រឹងប្រែង ក្នុងការបង្ការ ទប់ស្កាត់ ឈានទៅលុបបំបាត់អំពើជួញដូរមនុស្ស រហូតទទួលលទ្ធផលដ៏ធំធេងនេះ។ លទ្ធផលនេះក៏ជាការបង្ហាញនូវឆន្ទៈរួម និងកម្លាំងសរុប ដែលគ្រប់ភាគីពាក់ព័ន្ធ ទាំងរាជរដ្ឋាភិបាល ទាំងអង្គការមិនមែនរដ្ឋាភិបាលជាតិនិងអន្តរជាតិ ទាំងវិស័យសាសនា និងវិស័យឯកជន បាននាំគ្នាពុះពារគ្រប់ឧបសគ្គ និងភាពប្រឈមទាំងឡាយ ដើម្បីធ្វើឱ្យសម្រេចនូវលទ្ធផលនេះ។ ទន្ទឹមនឹងឱកាសបុណ្យចូលឆ្នាំថ្មីប្រពៃណីជាតិខ្មែរជិតឈានចូលមកដល់ ឯកឧត្តមអភិសន្តិបណ្ឌិតបានមានប្រសាសន៍លើកទឹកចិត្តដល់បណ្តាខេត្តជាប់ព្រំដែនទាំងអស់ ជាពិសេសខេត្តជាប់ព្រំដែនថៃ ដែលមានពលករច្រើនជាងគេ ត្រូវត្រៀមលក្ខណៈក្នុងការបង្ការ ទប់ស្កាត់ឱ្យបាន ព្រោះកន្លងទៅ ឯកឧត្តម បានសង្កេតឃើញថា នៅតែមានប្រជាពលរដ្ឋវិលមកវិញមួយចំនួនតូច ឆ្លងកាត់ដោយខុសច្បាប់ ដែលនេះទាមទារឱ្យមានការត្រួតពិនិត្យឱ្យបានច្បាស់លាស់ ដើម្បីគ្រប់គ្រងឱ្យបានជនអន្តោប្រវេសន៍ និងពលករចេញ-ចូលដោយស្របច្បាប់។ឯកឧត្តមបន្តទៀតថា ប្រទេសកម្ពុជា ក៏ជាប្រទេសមួយដែលរងគ្រោះដោយការគំរាមកំហែងពីបទល្មើសឆ្លងដែន មានជាអាទិ៍ បទល្មើសជួញដូរមនុស្ស បទល្មើសជួញដូរចែកចាយគ្រឿងញៀន និងបទល្មើសឆបោកតាមប្រព័ន្ធបច្ចេកវិទ្យាជាដើម។ ក្នុងនោះសមត្ថកិច្ចកម្ពុជា បានធ្វើប្រតិបត្តិការបង្ក្រាបមុខសញ្ញា និងទីតាំងដែលសង្ស័យថាប្រព្រឹត្តបទល្មើសជាបន្តបន្ទាប់ ហើយបានសហការជាមួយស្ថានទូត ឬស្ថានតំណាងបេសកកម្ម នៃបណ្តាប្រទេសពាក់ព័ន្ធ ដើម្បីដោះស្រាយបញ្ហាប្រជាពលរដ្ឋរបស់ខ្លួន ដែលត្រូវបានរកឃើញនៅកម្ពុជា និងចាប់ខ្លួនជនសង្ស័យបញ្ជូនទៅតុលាការ។ ជាមួយគ្នានោះប្រមុខក្រសួងមហាផ្ទៃ ឯកឧត្តមអភិសន្តិបណ្ឌិត ស សុខា បានលើកទឹកចិត្ត និងថ្លែងអំណរគុណគ្រប់កិច្ចសហការពីសមត្ថកិច្ចជំនាញ និងស្ថានទូត ឬស្ថានតំណាងនៃបណ្តាប្រទេស ក្នុងនោះមានសហរដ្ឋអាមេរិក ប្រទេសញ៉ូសេឡែន ប៉ូឡូញ បែលហ្ស៊ិក ចក្រភពអង់គ្លេស ប្រទេសអូស្រ្តាលី សាធារណរដ្ឋកូរ៉េ ឥណ្ឌា វៀតណាម ចិន ហ្វីលីពីន ឥណ្ឌូនេស៊ី ជប៉ុន ថៃ និងប្រទេសម៉ាឡេស៊ីជាដើម ដែលសកម្មភាពនេះបានបង្ហាញអំពីកិច្ចសហការល្អ ក្នុងការឆ្លើយតបទៅនឹងអំពើជួញដូរមនុស្ស កាន់តែមានប្រសិទ្ធភាព។ យោងតាមរបាយការណ៍ជាតិស្តីពីលទ្ធផលការងារប្រយុទ្ធប្រឆាំងអំពើជួញដូរមនុស្ស ឆ្នាំ២០២៤ និងលើកទិសដៅឆ្នាំ២០២៥ របស់ គ.ជ.ប.ជ រាជរដ្ឋាភិបាលកម្ពុជា នីតិកាលទី៧ បានចាត់ទុកការប្រយុទ្ធប្រឆាំងអំពើជួញដូរមនុស្ស ជាកិច្ចការអាទិភាពមួយក្នុងចំណោមការងារអាទិភាពដទៃទៀត រួមមាន៖ ការដោះស្រាយផលប៉ះពាល់នៃគ្រឿងញៀន គ្រឿងស្រវឹង គ្រោះថ្នាក់ចរាចរណ៍ និងបានដាក់ចេញនូវយុទ្ធសាស្ត្រឆ្លើយតបកាន់តែមានប្រសិទ្ធភាព ដោយខិតខំជំរុញសកម្មភាពឥតឈប់ឈរ ដើម្បីការពារសុវត្ថិភាព និងសន្តិសុខមនុស្ស ក៏ដូចជាសន្តិសុខជាតិទាំងមូល សម្រាប់ទ្រទ្រង់ដំណើរការអភិវឌ្ឍន៍ជាតិគ្រប់វិស័យ៕
ព័ត៌មានគួរចាប់អារម្មណ៍
សម្តេចមហាបវរធិបតី ហ៊ុន ម៉ាណែត ដឹកនាំគណៈប្រតិភូអញ្ជើញចូលរួមកិច្ចប្រជុំកំពូលអង្គការកិច្ចសហប្រតិបត្តិការសៀងហៃបូក នៅទីក្រុងធានជីន ប្រទេសចិន ()
ឧបនាយករដ្ឋមន្ត្រី កើត រិទ្ធ ដឹកនាំកិច្ចប្រជុំលើកទី៤ នៃក្រុមប្រឹក្សាភិបាលបណ្ឌិត្យសភាភូមិន្ទយុត្តិធម៌កម្ពុជា ដើម្បីពិនិត្យ និងពិភាក្សាលើលទ្ធផលនៃកិច្ចដំណើរការរបស់ ប.ភ.យ.ក. និងលក្ខណវិនិច្ឆ័យនិងលក្ខណសម្បត្តិសម្រាប់ជ្រើសរើសគ្រូបង្រៀននៃ ប.ភ.យ.ក. និងអនុម័តលើបញ្ជីឈ្មោះបេក្ខជន វិញ្ញាសា និងកាលបរិច្ឆេទនៃការប្រឡងប្រជែងជ្រើសរើសសិស្សវិជ្ជាជីវៈតុលាការ និងវិជ្ជាជីវៈច្បាប់ ក៏ដូចជាអនុម័តលើបទបញ្ជាផ្ទៃក្នុងសម្រាប់ក្រុមប្រឹក្សាភិបាលនៃ ប.ភ.យ.ក. ()
សម្តេចកិត្តិព្រឹទ្ធបណ្ឌិត ចាត់ឱ្យឯកឧត្តម គីម រិទ្ធី ចុះសួរសុខទុក្ខ និងផ្តល់អំណោយមនុស្សធម៌ជូនភរិយា និងក្រុមគ្រួសាររបស់វីរៈយុទ្ធជន ៥រូប រស់នៅខេត្តព្រះវិហារ ដែលត្រូវបានចាប់ខ្លួនក្រោយបទឈប់បាញ់ចូលជាធរមាន ()
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់ឱ្យឯកឧត្តម មាន ចាន់យ៉ាដា ចុះសួរសុខទុក្ខ និងផ្តល់អំណោយមនុស្សធម៌ជូនម្តាយបង្កេីត និងក្រុមគ្រួសាររបស់វីរៈយុទ្ធជន ១រូប រស់នៅខេត្តឧត្តរមានជ័យ ដែលត្រូវបានចាប់ខ្លួនក្រោយបទឈប់បាញ់ចូលជាធរមាន ()
រដ្ឋមន្ត្រីក្រសួងសាធារណការ អនុញ្ញាតឱ្យអ្នកគ្រប់គ្រងទូទៅក្រុមហ៊ុនដឹកជញ្ជូន CMA CGM Group ប្រចាំកម្ពុជា-វៀតណាម ចូលជួបពិភាក្សាការងារពាក់ព័ន្ធនឹងកាលានុវឌ្ឍនភាពក្នុងចូលរួមចំណែកអភិវឌ្ឍន៍វិស័យដឹកជញ្ជូន និងភស្តុភារកម្មនៅកម្ពុជា ()
វីដែអូ