ខេត្តកែប៖ លោកឧត្តមសេនីយ៍ទោ សម្បត្តិ សុធារដ្ឋ ស្នងការ នៃស្នងការដ្ឋាននគរបាលខេត្តកែប បានចេញលិខិតលេខ ១៥២ របក ចុះថ្ងៃទី០៣ ខែកុម្ភៈ ឆ្នាំ២០២៥ ជម្រាបជូនប្រធានអង្គភាពសារព័ត៌មាន FK News ដោយមានកម្មវត្ថុ៖ ស្នើកែតម្រូវខ្លឹមសារដែលបានចុះផ្សាយកាលពីថ្ងៃទី១៤ ខែមិថុនា ឆ្នាំ២០២៣ ពាក់ព័ន្ធនឹងករណីលោកវរសេនីយ៍ឯក ង៉ែត ទូច ស្នងការរង នៃស្នងការដ្ឋាននគរបាលខេត្តកែប ថាបានជម្រិតទារប្រាក់ចំនួន ៣.០០០ដុល្លារ ពីកម្មករទាំង០៤រូប។

ស្នងការនគរបាលខេត្តកែប បានជម្រាបជូនប្រធានអង្គភាពសារព័ត៌មាន FK News ជ្រាបថា៖ ក្រោយពីក្រសួងមហាផ្ទៃ បានទទួលពាក្យបណ្តឹងចុះថ្ងៃទី២០ ខែមិថុនា និងថ្ងៃទី២៦ ខែកញ្ញា ឆ្នាំ២០២៣ របស់ឈ្មោះ សិទ្ធ ច្រយ មានទីលំនៅបច្ចុប្បន្ន ផ្ទះលេខ ៦ក ផ្លូវ ១៤B១ ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ ស្នើសុំបដិសេធលិខិតលេខ ១៩០/២៣ លស ចុះថ្ងៃទី០៥ ខែឧសភា ឆ្នាំ២០២៣ របស់រដ្ឋបាលខេត្តកែប និងប្តឹងលោក ឆាង ឆៃ អភិបាល នៃគណៈអភិបាលស្រុកដំណាក់ចង្អើរ, លោកវរសេនីយ៍ឯក ង៉ែត ទូច ស្នងការរង នៃស្នងការដ្ឋាននគរបាលខេត្តកែប ទទួលផែនប្រឆាំងបទល្មើសសេដ្ឋកិច្ច, លោក វង្ស សុផល អតីតមន្ត្រីរដ្ឋបាលព្រៃឈើ, លោក ម៉ែន កប, មន្ត្រីកងរាជអាវុធហត្ថ និងបក្សពួក ដែលបានឃុបឃិតគ្នាយកដីរបស់លោកស្រីទំហំ ៨.៧៥ហិកតា ស្ថិតនៅភូមិចំការបី ឃុំពងទឹក ស្រុកដំណាក់ចង្អើរ ខេត្តកែប ដែលមានលិខិតទិញលក់ត្រឹមត្រូវធ្វើជាដីរបស់រដ្ឋ ព្រមទាំងចាប់កម្មករស្លូតត្រង់ចំនួន០៤រូប ធ្វើជាចំណាប់ខ្មាំង ដើម្បីជម្រិតទារប្រាក់ចំនួន ៣.០០០ដុល្លារ។

លិខិតរបស់ស្នងការនគរបាលខេត្តកែប បានបន្តឱ្យដឹងទៀតថា បន្ទាប់ពីទទួលបានពាក្យបណ្តឹង និងការចុះផ្សាយរបស់សារព័ត៌មាន FK News ក្រសួងមហាផ្ទៃ បានចាត់មន្ត្រីចុះធ្វើអធិការកិច្ច និងពិនិត្យឯកសារពាក់ព័ន្ធករណីខាងលើរួចមកសង្កេតឃើញថា លោកវរសេនីយ៍ឯក ង៉ែត ទូច ស្នងការរង នៃស្នងការដ្ឋាននគរបាលខេត្តកែប ពុំមានជាប់ពាក់ព័ន្ធការជម្រិតទារប្រាក់ពីកម្មករចំនួន ០៤រូប ដូចការចុះផ្សាយកាលពីថ្ងៃទី១៤ ខែមិថុនា ឆ្នាំ២០២៤ របស់អង្គភាពសារព័ត៌មាន FK News នោះទេ និងស្នើសុំកែតម្រូវខ្លឹមសារចុះផ្សាយឡើងវិញ ដើម្បីឱ្យសាធារណជន និងអ្នកតាមដានតាមបណ្តាញសង្គមជ្រាបព័ត៌មាន។

សូមជម្រាបថា កាលពីថ្ងៃទី១០ ខែមករា ឆ្នាំ២០២៥ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញលិខិតលេខ ០៧៣ សជណ ជម្រាបជូនលោកឧត្តមសេនីយ៍ទោ សម្បត្តិ សុធារដ្ឋ ស្នងការ នៃស្នងការដ្ឋាននគរបាលខេត្តកែប ដោយបញ្ជាក់ថា ក្រោយពីបានចាត់មន្ត្រីធ្វើអធិការកិច្ច និងពិនិត្យឯកសារពាក់ព័ន្ធរួចមក ក្រសួងមហាផ្ទៃ សូមធ្វើការណែនាំ លោកឧត្តមសេនីយ៍ទោ ស្នងការ នៃស្នងការដ្ឋាននគរបាលខេត្តកែប ឱ្យធ្វើលិខិតជម្រាបជូនទៅសារព័ត៌មាន FK News ឱ្យកែតម្រូវខ្លឹមសារដែលបានចុះផ្សាយកាលពីថ្ងៃទី១៤ ខែមិថុនា ឆ្នាំ២០២៣ ពាក់ព័ន្ធករណីលោកវរសេនីយ៍ឯក ង៉ែត ទូច ស្នងការរង នៃស្នងការដ្ឋាននគរបាលខេត្តកែប ថាបានជម្រិតទារប្រាក់ចំនួន ៣.០០០ដុល្លារ (បីពាន់ដុល្លារអាមេរិក) ពីកម្មករចំនួន ០៤រូប៕