បាត់ដំបង៖ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានណែនាំក្រើនរំលឹកដល់ អាជ្ញាធរ និងប្រជាពលរដ្ឋទាំងអស់ត្រូវចូលរួម ទប់ស្កាត់ការរំលោភបំពានដីចំណីផ្លូវ ចៀសឆ្ងាយពីគ្រឿងញៀន ជំរុញផ្សព្វផ្សាយយុទ្ធនាការអប់រំអនាម័យបរិស្ថាន។

ការណែនាំរបស់ ឯកឧត្តម សុខ លូ អភិបាលខេត្តបាត់ដំបង នាឱកាសអញ្ជើញជាអធិបតីរួមជាមួយ ឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តបាត់ដំបង អាណត្តិទី៤ សម្រាប់ឆ្នាំ២០២៥ នៅស្រុកឯកភ្នំ នាថ្ងៃទី៨ ខែធ្នូ ឆ្នាំ២០២៥។

ដោយមានការអញ្ជើញចូលរួមពី សមាជិកក្រុមប្រឹក្សាខេត្ត លោកប្រធាន អនុប្រធានមន្ទីរ អង្គភាពជុំវិញខេត្ត កងកម្លាំងទាំង៣ សមាជិកក្រុមប្រឹក្សាឃុំ និងប្រជាពលរដ្ឋ សិស្សនិសិត្ស លោកគ្រូ អ្នកគ្រូនិងអ្នកពាក់ព័ន្ធផ្សេងបានចូលរួមយ៉ាងច្រើនកុះករ ដែលប្រារព្ធធ្វើឡើងនៅសាលាស្រុកឯកភ្នំ។

ឯកឧត្តម អ៊ុយ រី ប្រធានក្រុមប្រឹក្សាខេត្ត មានប្រសាសន៍ថា ការរៀបចំវេទិកាផ្សព្វផ្សាយ និងពិគ្រោះយោបល់ គឺជាឧបករណ៍ដ៏មានសារៈសំខាន់មួយសម្រាប់លើកកម្ពស់គណនេយ្យភាព តម្លាភាព និងការចូលរួមរបស់ប្រជាពលរដ្ឋទាំងបុរស និងស្ត្រីក្នុងកិច្ចដំណើរការអភិបាលកិច្ចរបស់ក្រុមប្រឹក្សានៃរដ្ឋបាលថ្នាក់ក្រោមជាតិ។ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តបាត់ដំបង អាណត្តិទី៤ នាថ្ងៃនេះគឺដើម្បីផ្ដល់ព័ត៌មានដល់ក្រុមប្រឹក្សាក្រុង-ស្រុក ក្រុមប្រឹក្សាឃុំ-សង្កាត់ សហគមន៍ប្រជាពលរដ្ឋ និងអ្នកពាក់ព័ន្ធអំពីសកម្មភាពនានារបស់ក្រុមប្រឹក្សា និងគណៈអភិបាលខេត្ត ក្នុងការឆ្លើយតបទៅនឹងសំណើរទាំងឡាយរបស់ក្រុមប្រឹក្សាក្រុង-ស្រុក ក្រុមប្រឹក្សាឃុំ-សង្កាត់ និងសហគមន៍ប្រជាពលរដ្ឋ ដើម្បីប្រមូល ពិភាក្សាអំពីសំណើរ និងមតិយោបល់នានា សម្រាប់សកម្មភាពឆ្នាំខាងមុខ។

ឯកឧត្តម សុខ លូ អភិបាល នៃគណៈអភិបាលខេត្ត បានបញ្ជាក់ថា ក្នុងវេទិកាផ្សព្វផ្សាយ និងពិគ្រោះយោបល់យើងទាំងអស់គ្នាបានពិភាក្សាពិគ្រោះយោបល់ ជាមួយអ្នកចូលរួមទាំងអស់ បានរកឃើញនូវបញ្ហាអាទិភាពសំខាន់ៗសម្រាប់រដ្ឋបាលខេត្តយកមកពិនិត្យពិចារណាក្នុងការឆ្លើយតប ព្រមទាំងដោះស្រាយដើម្បីលើកកម្ពស់ជីវភាពរស់នៅរបស់ប្រជាពលរដ្ឋក្នុងខេត្ត ជាពិសេសពង្រឹងការចូលរួមរបស់ប្រជាពលរដ្ឋ ក្នុងកិច្ចអភិវឌ្ឍន៍ខេត្តឱ្យកាន់តែល្អប្រសើរឡើង ក្នុងគោលបំណងពង្រឹងយន្តការតម្លាភាព ព្រមទាំងលើកកម្ពស់គោលការណ៍អភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ។

ឯកឧត្តម សុខ លូ បានបន្តណែនាំក្រើនរំលឹកដល់ អាជ្ញាធរ និងប្រជាពលរដ្ឋទាំងអស់ត្រូវចូលរួម ទប់ស្កាត់ការរំលោភបំពានដីចំណីផ្លូវ ចៀសឆ្ងាយពីគ្រឿងញៀន ជំរុញផ្សព្វផ្សាយយុទ្ធនាការអប់រំអនាម័យបរិស្ថាន កាត់បន្ថយការរំពងសំឡេងនៅតាមទីប្រជុំជន និងកន្លែងកម្សាន្តផ្សេងៗដែលនាំឱ្យរំខានដល់ការរស់នៅ។

អង្គវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត បានដំណើរការពេញមួយព្រឹកទទួលបានលទ្ធផលយ៉ាងល្អ ពោរពេញដោយខ្លឹមសារ និងបញ្ជាក់បានថា សមាជិក សមាជិកា នៃអង្គវេទិកាបានយកអស់ស្មារតី និងបញ្ញាញាណ ក្នុងការស្តាប់ និងតាមដាន ចូលរួមបញ្ចេញមតិ សំណូមពរ និងសំណើរ ក្តីកង្វល់ផ្សេងៗជូនមកកាន់អង្គវេទិកាដោះស្រាយ។

គួរបញ្ជាក់ផងដែរថា ក្រុមប្រឹក្សាខេត្តបាត់ដំបង បើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៤ សម្រាប់ឆ្នាំ២០២៥ រៀបចំដោយរដ្ឋបាលខេត្តបាត់ដំបង បានប្រព្រឹត្តទៅដោយរលូន និងមានការចូលរួមរបស់ប្រជាពលរដ្ឋយ៉ាងសកម្មក្នុងការលើកឡើងជាសំណួរ ក្ដីកង្វល់ សំណើរ សំណូមពរ និងទទួលបានសំណូមពរ និងក្តីកង្វល់ពីប្រជាពលរដ្ឋ ចំនួន៩ករណី ដោយបានឆ្លើយតប បកស្រាយបំភ្លឺនូវសំណួរ និងសំណូមពរ ភ្លាមៗបានទាំងអស់ក្នុងអង្គវេទិកាដោយជោគជ័យ៕