បាត់ដំបង៖ យោងតាមការចុះផ្សាយរបស់ទីភ្នាក់ងារសារព័ត៌មានវ៉ាយអូរី (VIORY) កាលពីថ្ងៃទី២៨ ខែធ្នូ ឆ្នាំ២០២៥ បានឱ្យដឹងថា ភ្ញៀវទេសចរបានចាប់ផ្តើមត្រឡប់ទៅកម្សាន្តនៅតំបន់ភ្នំសំពៅ ខេត្តបាត់ដំបងវិញហើយកាលពីថ្ងៃសៅរ៍ ដែលនេះបង្ហាញពីសុទិដ្ឋិនិយមដោយស្មារតីប្រុងប្រយ័ត្ន បន្ទាប់ពីមានកិច្ចព្រមព្រៀងរវាងកម្ពុជា និងថៃ ក្នុងការអនុវត្តនូវការឈប់បាញ់គ្នាជាបន្ទាន់ ក្រោយពីមានការប៉ះទង្គិចគ្នាតាមព្រំដែនសារឡើងវិញកាលពីដើមខែធ្នូ ។

តាមរយៈរូបភាពវីដេអូពីទីតាំងនោះ គេឃើញមានភ្ញៀវទេសចរមកទស្សនាទិដ្ឋភាពពីលើកំពូលភ្នំ ដើរកម្សាន្តតាមដងផ្លូវ និងធ្វើដំណើរតាមជណ្តើរដែលមានហ្វូងស្វាចុះឡើងជាហូរហែ។ សម្រាប់អ្នកស្រុក និងបុគ្គលិកកម្មករក្នុងតំបន់ សកម្មភាពទេសចរណ៍ដែលចាប់ផ្តើមឡើងវិញនេះ បានផ្តល់នូវអារម្មណ៍ធូរស្រាល បន្ទាប់ពីស្ថិតក្នុងភាពមិនច្បាស់លាស់អស់រយៈពេលជាច្រើនសប្តាហ៍ ។

អាជីវករក្នុងស្រុកម្នាក់ បានសម្តែងក្ដីត្រេកអរចំពោះការផ្អាកការប្រយុទ្ធគ្នា ដោយនិយាយថា ទោះបីជាសន្តិភាពទើបតែចាប់ផ្ដើមឡើងវិញក្នុងរយៈពេលខ្លីក៏ដោយ ក៏វាមានន័យណាស់សម្រាប់លោក។ លោកនិយាយថា៖ «យើងទទួលបានសន្តិភាពហើយ ទោះបីជាសន្តិភាពទើបតែចាប់ផ្ដើមមកវិញត្រឹមតែមួយថ្ងៃក៏ដោយ ក៏ធ្វើឱ្យខ្ញុំមានសេចក្តីសុខដែរ» (លោកលើកឡើងបែបនេះ បន្ទាប់ពីកម្ពុជា-ថៃ ព្រមព្រៀងគ្នាលើបទឈប់បាញ់ កាលពីថ្ងៃទី២៧ ខែធ្នូ) ។

ទន្ទឹមគ្នានោះ លោក សីហា ដែលជាមគ្គុទ្ទេសក៍ទេសចរណ៍ ក៏បានសម្តែងក្តីសង្ឃឹមដែរថា ការឈប់បាញ់គ្នាបែបនេះនឹងជួយស្តារវិស័យទេសចរណ៍ និងជីវភាពរស់នៅឡើងវិញ បន្ទាប់ពីរងនូវការរំខានដោយជម្លោះ។ លោកនិយាយថា៖ «នៅពេលកម្ពុជាទទួលបានសន្តិភាព មនុស្សជាច្រើននឹងសប្បាយចិត្តក្នុងការត្រឡប់ទៅស្រុកកំណើត និងរស់នៅជាមួយគ្រួសារវិញ។ អំឡុងមានការប្រយុទ្ធគ្នា មនុស្សជាច្រើនបានចាកចេញពីភូមិ ហើយជីវិតគឺពិបាកខ្លាំងណាស់។ នៅពេលការប្រយុទ្ធគ្នាបានបញ្ឈប់ ភ្ញៀវទេសចរនឹងមកកម្សាន្តនៅកម្ពុជាកាន់តែច្រើនឡើងៗ» ។

ក្នុងពេលដំណាលគ្នា ភ្ញៀវទេសចរជាតិនិងអន្តរជាតិដែលទៅកម្សាន្តនៅទីនោះ បានបង្ហាញអារម្មណ៍ស្រដៀងគ្នា ដោយសង្ឃឹមថាភាពស្ងប់ស្ងាត់នេះនឹងមានស្ថិរភាពយូរអង្វែង ដើម្បីអាចឱ្យមានការធ្វើដំណើរដោយសេរីក្នុងតំបន់។ ភ្ញៀវទេសចរបរទេសម្នាក់ និយាយថា គាត់ធ្លាប់មានភាពស្ទាក់ស្ទើរក្នុងការធ្វើដំណើរឆ្លងកាត់ប្រទេសកម្ពុជា និងថៃ ដូច្នេះវាជារឿងល្អប្រសិនបើគ្មានការប្រយុទ្ធគ្នាបែបនេះក្នុងរយៈពេលយូរ ដើម្បីឱ្យមានសន្តិភាព និងអាចធ្វើដំណើរបានទៅគ្រប់ទីកន្លែង ៕