បាត់ដំបង៖ ព្រះសង្ឃ មន្រ្តីរាជការ យុវជន និងប្រជាពលរដ្ឋនៅខេត្តបាត់ដំបង បានស្ម័គ្រព្រះទ័យ និងចិត្ត ចូលមកធ្វើការបរិច្ចាគឈាម ដើម្បីជួយដល់វីរៈកងទ័ពជួរមុខ និងជនភៀសសឹក ដែលរងគ្រោះបណ្តាលមកពីសង្គ្រាមឈ្លានពានពីភាគីថៃប្រដាប់ដោយអាវុធចូលមកក្នុងបូរណភាពទឹកដីនៃកម្ពុជា ។អភិបាលខេត្តបាត់ដំបង លោក សុខ លូ ក្នុងពេលចុះពិនិត្យដំណើរការបរិច្ចាគឈាមនៅទីស្នាក់ការ ស.ស.យ.កខេត្តបាត់ដំបង នៅថ្ងៃទី១០ ខែធ្នូ ឆ្នាំ២០២៥ បានថ្លែងអំណរគុណដល់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោកអភិសន្តិបណ្ឌិត ស សុខា អនុប្រធានស.ស.យ.ក ទទួលបន្ទុកខេត្តបាត់ដំបង ព្រៃវែង និងបន្ទាយមានជ័យ ដែលបានឯកភាពឱ្យ ស.ស.យ.កខេត្តបាត់ដំបង សហការជាមួយរដ្ឋបាលខេត្តបាត់ដំបង រៀបចំទទួលការបរិច្ចាគឈាមពីមន្រ្តីរាជការ ព្រះសង្ឃ ប្រជាពលរដ្ឋ និងក្រុមយុវជននាពេលនេះ ។លោកអភិបាលខេត្តបាត់ដំបង បានបញ្ជាក់ថា បន្ទាប់ពីបើកដំណើរការទទួលការបរិច្ចាគឈាមភ្លាម មានប្រជាពលរដ្ឋ និងព្រះសង្ឃបានចូលរួមផ្ដល់ឈាមយ៉ាងច្រើនកុះករដែលនេះបង្ហាញពីស្មារតីសាមគ្គីភាព ឯកភាព ស្រឡាញ់ជាតិ ស្នេហាជាតិរបស់មន្រ្តីរាជការ ព្រះសង្ឃ ប្រជាពលរដ្ឋ និងក្រុមយុវជនពេញបេះដូង ។លោក បានបន្តទៀតថា ការបរិច្ចាគឈាមគឺជាការបង្ហាញពីស្មារតីសាមគ្គីជាតិ រួបរួមជាតិ ដើម្បីត្រៀមលក្ខណៈជួយសង្រ្គោះវីរៈយុទ្ធជន និងប្រជាពលរដ្ឋ ក្នុងករណីចាំបាច់ ហើយឈាម ដែលទទួលបាននេះអាចនឹងត្រូវផ្ដល់ជូនតាមបណ្ដាខេត្ត និងអង្គភាព ដែលមានតម្រូវការ ហើយការផ្ដល់ឈាមនេះគឺមិនមានប៉ះពាល់ដល់សុខភាពនោះឡើយ ជាទូទៅបុរស៣ខែ អាចផ្ដល់ឈាមបាន១ដង និងនារី៤ខែ អាចផ្ដល់ឈាមបាន១ដង ខណៈដែលការផ្ដល់ឈាមនេះ គឺមានក្រុមគ្រួពេទ្យពិនិត្យអាយុ និងសុខភាពត្រឹមត្រូវ ហើយសូមអំពាវនាវដល់មន្រ្តីរាជការ ព្រះសង្ឃ និងប្រជាពលរដ្ឋ សូមបន្តចូលរួមបរិច្ចាគឈាមឱ្យបានគ្រប់ៗគ្នា ។សូមបញ្ជាក់ថា ស.ស.យ.ក ខេត្តបាត់ដំបង សហការជាមួយរដ្ឋបាលខេត្តបាត់ដំបង មន្ទីរសុខាភិបាលខេត្ត និងមជ្ឈមណ្ឌលផ្តល់ឈាមខេត្តបាត់ដំបង បានរៀបចំព្រឹត្តិការណ៍នៃការបរិច្ចាគឈាមដោយស្ម័គ្រចិត្តក្រោមប្រធានបទ៖ អ្នកជួរក្រោយ រួមគ្នាសង្គ្រោះអ្នកជួរមុខ ក្នុងគោលបំណងដើម្បីជាកម្លាំងចិត្តជួយដល់វីរៈកងទ័ពជួរមុខ និងប្រជាជននៅតាមព្រំដែន ក៏ដូចជាការរួមចំណែកក្នុងការថែរក្សាការពារបូរណភាពទឹកដីកម្ពុជា ប្រយុទ្ធនឹងសត្រូវឈ្លានពាន ។ការបរិច្ចាគឈាមដោយស្ម័គ្រចិត្ត ធ្វើឡើងចាប់ពីថ្ងៃទី១០ ខែធ្នូ ឆ្នាំ២០២៥ វេលាម៉ោង៩៖០០នាទីព្រឹក រហូតដល់ម៉ោង ១៦៖០០នាទីរសៀលតទៅ នៅស្នាក់ការ ស.ស.យ.ក. ខេត្តបាត់ដំបង ស្ថិតនៅផ្លូវពោធិវង្ស ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ៕
ព័ត៌មានគួរចាប់អារម្មណ៍
សម្ដេចតេជោ ហ៊ុន សែន ជំរុញឲ្យកម្ពុជា-វៀតណាម សហការគ្នាធានាសន្ដិសុខតាមព្រំដែន រួមគ្នាប្រយុទ្ធនឹងព័ត៌មានក្លែងក្លាយ ពិសេសចៀសវាងកុំឲ្យមានការប្រើប្រាស់កម្លាំងក្នុងប្រទេសណាមួយប្រឆាំងនឹងប្រទេសមួយទៀត រវាងកម្ពុជា-ឡាវ-វៀតណាម ()
សម្តេចតេជោ ហ៊ុន សែន សម្តែងការទទួលខុសត្រូវ និងសូមអភ័យទោសប្រជាពលរដ្ឋទូទាំងប្រទេស ដោយសារជឿទុកចិត្តប្រទេសថៃពេក និងមិនបានត្រៀមខ្លួនគ្រប់គ្រាន់ សម្រាប់ការប្រយុទ្ធ ()
សម្តេចធិបតី ហ៊ុន ម៉ាណែត អញ្ជើញបំពេញទស្សនកិច្ចផ្លូវការ នៅសាធារណរដ្ឋសង្គមនិយមវៀតណាម ()
អភិបាលខេត្តប៉ៃលិន អញ្ជើញបួងសួងសុំសេចក្តីសុខចម្រើនក្នុងឱកាសលើករូបសំណាកព្រះវិស្ណុធ្វើពីថ្មភ្នំដាក់លើរង្វង់មូលថ្មី ដើម្បីលើកកម្ពស់សោភណភាព និងសុវត្ថិភាព ក្នុងការធ្វើដំណើររបស់ប្រជាពលរដ្ឋ ()
សម្តេច ស ខេង អញ្ជើញជាអធិបតីក្នុងកិច្ចប្រជុំផ្សព្វផ្សាយផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៦ ឆ្នាំ២០២៧ ()
វីដែអូ