អភិបាលខេត្តបាត់ដំបង អញ្ជើញដឹកនាំកិច្ចប្រជុំពិភាក្សាការងារត្រៀមរៀបចំពិធីបុណ្យឆ្លងឆ្នាំសកល២០២៥-២០២៦
បាត់ដំបង៖ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង នៅថ្ងៃទី២១ ខែវិច្ឆិកា ឆ្នាំ២០២៥ បានអញ្ជើញដឹកនាំកិច្ចប្រជុំពិភាក្សាការងារស្តីពីការត្រៀមរៀបចំពិធីបុណ្យឆ្លងឆ្នាំសកល ២០២៥-២០២៦ និងការតាំងពិរព័រណ៍ម្ហូបអាហារ បង្អែមខ្មែរ ឱ្យបានដំណើរការទៅដោយរលូន ក្នុងឱកាសអបអរពិធីបុណ្យឆ្លងឆ្នាំសកល ដែលគ្រោងនឹងរៀបចំឡើងនៅថ្ងៃទី២៩-៣១ ខែធ្នូ ឆ្នាំ២០២៥ នាពេលខាងមុខនេះ ដើម្បីផ្សព្វផ្សាយពីមុខម្ហូបខ្មែរដ៏សម្បូរបែបរបស់អ្នកបាត់ដំបង និងដើម្បីទាក់ទាញ ភ្ញៀវជាតិ និងអន្តរជាតិ មកកំសាន្តក្នុងខេត្តបាត់ដំបង។
កិច្ចប្រជុំនេះមានការអញ្ជើញចូលរួមពី លោកអភិបាលរងខេត្ត លោកនាយករដ្ឋបាល លោកប្រធាន អនុប្រធានមន្ទីរ អង្គភាពនានាជុំវិញខេត្ត លោកអភិបាលក្រុង និងអ្នកពាក់ព័ន្ធមួយចំនួនទៀត ប្រារព្ធធ្វើឡើងនៅសាលប្រជុំសាលាខេត្តបាត់ដំបង។
គួរបញ្ជាក់ផងដែរ រដ្ឋបាលខេត្តត្រៀមរៀបចំការតាំងពិរព័រណ៍ម្ហូបអាហារ និងបង្អែមខ្មែរ របស់អ្នកបាត់ដំបងនេះឡើង គឺចង់បង្ហាញពីសក្តានុពល ភាពទាកទាញនៃម្ហូបអាហារប្រចាំខេត្ត ក៏ដូចជាចូលរួមផ្សព្វផ្សាយពីវប្បធម៌ ប្រពៃណី ទំនៀមទម្លាប់ដ៏សម្បូរបែប របស់អ្នកបាត់ដំបង ទៅកាន់ភ្ញៀវទេសចរ ដែលមកពីគ្រប់ទិសទីឱ្យបានស្គាល់កាន់តែច្រើន និងលើកស្ទួយវិស័យម្ហូបអាហារ វប្បធម៌ ប្រពៃណីរបស់ខ្មែរកាន់តែល្បីល្បាញ៕
