(បាត់ដំបង)៖ លោក អ៊ុយ រី ប្រធានក្រុមប្រឹក្សាខេត្ត និងលោក សឿម ប៊ុនរិទ្ធ អភិបាលរងខេត្ត តំណាងលោក សុខ លូអភិបាលខេត្តបាត់ដំបង រួមទាំងមន្ត្រីពាក់ព័ន្ធ នៅព្រឹកថ្ងៃទី២៦ ខែធ្នូ ឆ្នាំ២០២៤នេះ បានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តបាត់ដំបងអាណត្តិទី៤ ប្រចាំឆ្នាំ២០២៤ នៅសាលាស្រុកមោងឫស្សី ខេត្តបាត់ដំបង ដោយមានអ្នកចូលរួមមកពីមន្ទីរពាក់ព័ន្ធនានា ជុំវិញខេត្ត, ក្រុមប្រឹក្សា ស្រុក ឃុំ, មន្រ្តីរាជការ,លោកគ្រូ អ្នកគ្រូ សិស្ស និស្សិត កងកម្លាំងទាំងបី និងប្រជាពលរដ្ឋចូលរួមជាង៤០០។

នាឱកាសនោះលោក អ៊ុយ រី បានឱ្យដឹងថា ការរៀបចំវេទិកាផ្សព្វផ្សាយ និងពិគ្រោះយោបល់ គឺជាឧបករណ៍ដ៏មានសារៈសំខាន់មួយសម្រាប់លើកកម្ពស់គណនេយ្យភាព តម្លាភាព និងការចូលរួមរបស់​​​ប្រជាពលរដ្ឋទាំងបុរស និងស្ត្រីក្នុងកិច្ចដំណើរការអភិបាលកិច្ចរបស់ក្រុមប្រឹក្សានៃរដ្ឋបាលថ្នាក់ក្រោមជាតិ។

វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តបាត់ដំបង អាណត្តិទី៤ នាថ្ងៃនេះគឺដើម្បីផ្ដល់ព័ត៌មានដល់ក្រុមប្រឹក្សាក្រុង-ស្រុក ក្រុមប្រឹក្សាឃុំ-សង្កាត់ សហគមន៍ប្រជាពលរដ្ឋ និងអ្នកពាក់ព័ន្ធ​អំពីសកម្មភាពនានារបស់ក្រុមប្រឹក្សា និងគណៈអភិបាលខេត្ត ក្នុងការឆ្លើយតបទៅនឹងសំណើទាំងឡាយរបស់ក្រុមប្រឹក្សាក្រុង-ក្រុមប្រឹក្សាសង្កាត់ និងសហគមន៍ប្រជាពលរដ្ឋប្រមូលមកពិភាក្សាអំពីសំណើ និងមតិយោបល់បទពិសោធន៍នានា សម្រាប់ធ្វើសកម្មភាពឆ្នាំខាងមុខ ដែលមានការចូលរួមរបស់សមាជិកក្រុមប្រឹក្សាគណ:អភិបាលខេត្ត សមាជិកក្រុមប្រឹក្សា គណ:អភិបាលស្រុក សមាជិកក្រុមប្រឹក្សាឃុំ រួមទាំងតំណាងសហគមន៍ប្រជាពលរដ្ឋ សិស្សានុសិស្ស និងអ្នកពាក់ព័ន្ធដទៃផ្សេងទៀត។

លោក សឿម ប៊ុនរិទ្ធ បានបញ្ជាក់ថា ក្នុងវេទិកាផ្សព្វផ្សាយ និងពិគ្រោះយោបល់យើងទាំងអស់គ្នាបានពិភាក្សាពិគ្រោះយោបល់ ជាមួយអ្នកចូលរួមទាំងអស់បានរកឃើញនូវបញ្ហាអាទិភាពសំខាន់ៗ​សម្រាប់រដ្ឋបាលខេត្ត យកទៅពិនិត្យពិចារណាក្នុងការឆ្លើយតប ដើម្បីលើកកម្ពស់ជីវភាពរស់នៅរបស់ប្រជាពលរដ្ឋក្នុងខេត្ត ជាពិសេសពង្រឹងការចូលរួមរបស់ប្រជាពលរដ្ឋ ក្នុងកិច្ចអភិវឌ្ឍន៍ខេត្តឱ្យកាន់តែល្អប្រសើរឡើង ក្នុងគោលបំណងពង្រឹងយន្តការតម្លាភាព ព្រមទាំងលើកកម្ពស់គោលការណ៍អភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ។

សូមបញ្ជាក់ថា អង្គផ្សព្វផ្សាយវេទិកានាពេលនេះបានប្រព្រឹត្តទៅដោយរលូន និងមានការចូលរួមរបស់ប្រជាពលរដ្ឋយ៉ាងសកម្មក្នុងការលើកឡើងជាសំណួរ ក្ដីកង្វល់ សំណើ សំណូមពរ និងបានឆ្លើយតប និងបកស្រាយបំភ្លឺនូវសំណួរ និងសំណូមពរទាំងអស់មានអ្នកសួរផ្ទាល់មាត់មាន ៥នាក់ ក្នុងនោះមានសំណួរសរសេរលើក្រដាស់១ សរុបមាន៦សំណួរ ហើយត្រូវបានគណ:អធិបតី ធ្វើការដោះស្រាយជូនភ្លាមៗនៅក្នុងអង្គវេទិកាប្រកបដោយជោគជ័យផងដែរ៕