ក្រសួងអប់រំ ណែនាំពីវិធានការសុខភាព និងសុវត្ថិភាព ក្នុងដំណើរការសំណេរ សម្រាប់ការប្រឡងបាក់ឌុប
ភ្នំពេញ ៖ ក្រសួងអប់រំ យុវជន និងកីឡាបានធ្វើការណែនាំពីវិធានការសុខភាព និងសុវត្ថិភាព ក្នុងដំណើរការសំណេរសម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង៖ ០៨ តុលា ២០២៤។
តាមរយៈសេចក្ដីណែនាំរបស់ក្រសួងអប់រំ នាថ្ងៃទី៧ តុលា នេះ ឱ្យដឹងថា ដើម្បីចូលរួមលើកកម្ពស់ ការថែទាំសុខភាព និងសុវត្ថិភាពសម្រាប់ គណៈមេប្រយោគ គណៈកម្មការនានា និង បេក្ខជន អំឡុងពេល នៃដំណើរការសំណេរ នៃការប្រឡងសញ្ញាបត្រមធ្យម សិក្សាទុតិយភូមិ សម័យប្រឡង៖ ០៨ តុលា ២០២៤ ក្រសួងអប់រំ បានណែនាំដល់គណៈមេប្រយោគ ប្រធានមណ្ឌលប្រឡង និងគណៈកម្មការនានា ព្រម ទាំងបេក្ខជនទាំងអស់ ដូចជា ៖ ផ្សព្វផ្សាយសេចក្តីណែនាំប្រតិបត្តិស្តីពី វិធានការសុខភាព និងសុវត្ថិភាព សម្រាប់ការប្រឡងសញ្ញាបត្រមធ្យម សិក្សាទុតិយភូមិ សម័យប្រឡង៖ ០៨ តុលា ២០២៤ ដល់គណៈមេប្រយោគ និងគណៈកម្មការនានាក្នុង ពេលប្រជុំណែនាំ ។
ក្រសួង បន្ដថា ទទួលទានដំណេក បរិភោគអាហារ និងទឹកស្អាត ឱ្យបានគ្រប់គ្រាន់ប្រកបដោយសុវត្ថិភាព និងសុខភាព ជាពិសេសត្រូវទទួលទាន អាហារពេលព្រឹក, ប្រកាន់ខ្ជាប់ក្បួនអនាម័យ ជាប្រចាំ ដូចជាអនាម័យខ្លួនប្រាណ សម្លៀកបំពាក់ និងកន្លែងស្នាក់នៅ ព្រមទាំង, លាងសម្អាតដៃ ឱ្យបានញឹកញាប់ ត្រៀមសម្ភារៈការពារកម្ដៅថ្ងៃ និងភ្លៀង ដូចជា មួក ឆត្រ ឬអាវភ្លៀង សម្រាប់ប្រើប្រាស់នៅពេលធ្វើដំណើរទៅ និងមកមណ្ឌលប្រឡង ជាពិសេស ប្រធានមណ្ឌលប្រឡងត្រូវត្រៀមឆត្រ និងអាវភ្លៀង សម្រាប់បម្រើការងារ.
ក្រសួង បន្ថែមថា ក្នុងដំណើរការសំណេរ គោរពច្បាប់ចរាចរណ៍ និងបើកបរដោយប្រុងប្រយ័ត្នក្នុងពេលធ្វើដំណើរទៅនិងមកមណ្ឌលប្រឡង ដើម្បី ចៀសវាងគ្រោះថ្នាក់កើតឡើងជាយថាហេតុ, ក្នុងករណីមានភ្លៀងធ្លាក់ខ្លាំង គណៈមេប្រយោគ គណៈកម្មការនានា និងប្រធានមណ្ឌល ត្រូវមានភាព បត់បែន ក្នុងការគ្រប់គ្រងដំណើរការសំណេរ និងរាយការណ៍ជូនគណៈមេប្រយោគទូទាំងប្រទេសប្រចាំការ៕
